DILI, STLTIMORLESTE.com – Eskola Funan International School (FIS) fo graduasaun ba estudante nain 42, neebe kompleta ona sira nia materia baziku durante nee iha FIS.
Tuir Diretora FIS, Octavia Barros katak, graduasaun nee laos foin halao ba dala uluk, maibe antes nee halao ona primera gradusaun, no agora hanesan segunda graduasaun ba estudante sira.
“Graduasaun ida nee ba dala rua ona, tinan kotuk iha graduasaun ba estudante nain 12 deit, maibe tinan nee aumenta makaas, estudante nain 42 mak hetan graduasaun,” dehan Octavia ba STL, Sesta nee (22/11/2024).
Tuir Octavio, daudaun nee komesa simu rejistrasaun ba estudante foun no hanesan Diretora esforsu hamutuk ho Teacher sira neebe hanorin iha neeba, oinsa ba futuru atu hadia diak liu tan kualidade iha eskola neeba.
Tanba Eskola nee hanorin husi Teacher Timoroan hamutuk nain 10, no Teacher Internasional nain haat husi nasaun Filipina no Indonezia.
Diretora nee mos hatoo agradese ba inan aman sira neebe tau konfiansa ba iha Teacher sira no eskola refere, hodi tau sira nia oan eskola iha fatin neeba. No iha eskola refere estudante sira aprende buat hotu ho lian Ingles, hahu husi hakerek, lee, kanta no mos koalia iha ambiente eskola nian.
Nunee, estudante sira neebe remata ona sira nia graduasaun sei tama iha primeiru ano no sei kontinua nafatin iha neeba, tanba eskola refere iha ona primeiru anu no segundu anu.
(ter)
