DILI, STLTIMORLESTE.com – Jurista Sergio Dias Quintas hatete, bainhira Tribunal Rekursu (TR) hasai akordaun ba iha fiskalizasaun abstrata kona-ba lei pensaun vitalisia neebe Estudante Universitairu Timor Leste (EUTL) kestiona, nee kabe ba kompetensia Juiz prosesu ka Juiz titular mak hatene, tanba la define ninia prazu.
“Tanba iha norma tranmitasaun prosesual la define kona-ba prazu, entaun depende ba Juiz neebe maka toma konta prosesu nee,” dehan Quintas ba jornalista STL iha Kaikoli, Dili Tersa (16/12/2025).
Prosesu nee bainhira tama Tribunal tuir nia sei distribui ba Juiz sira, neebe laos ema ruma maka distribui maibe nee sistema iha Tribunal maka manda.
Nia dehan, Prezidente Tribunal Rekursu (PTR) deklara nia taka ibun kona-ba fiskalizasun abstrata ba lei pensaun vitalisia, tanba prosesu sei lao hela iha Tribunal Rekursu. PTR nuudar Juiz nia hatene kona ba transmitasaun prosesual, nia labele koalia iha publiku kona-ba kazu nee, tanba norma la admiti.
Iha fatin ketak, Akademiku UNTL, Sebastiao dos Santos dehan, Tribunal iha nia regra rasik, maibe tenke foti desizaun neebe justu.
“Tribunal iha nia regra rasik, tanba nee hotu hotu hakruk ba regra neebe iha, maibe nafatin tau esperansa atu foti desizaun neebe justu,” dehan nia.
Akademiku nee tau konfiansa ba iha Juiz sira atu halao knaar, atu deside loloos kona-ba pedidu neebe iha, tanba publiku no estudante sira hein hela desizaun konaba pedidu Fiskalizasaun.
Antes nee, Prezidente Tribunal Rekursu, Afonso Carmona dehan, prosesu sei lao hela, tanba nee nia parte seidauk bele fo komentariu kona-ba ida nee.
“Ida nee prosesu lao hela, estudante sira mos koalia hela hau taka ibun lai tanba prosesu lao hela, justru buat ida nee maka atu kumplika situasaun ba ida nee hau sei no comen hau hateten bebeik buat ida Tribunal prosesu lao hela ita sei la komentariu,” dehan PTR, Afonso.
Jornalista: Terezinha De Deus
Editora: Carme Ximenes
