DILI, STLTIMORLESTE.com – Relasiona ho pedidu neebe Bankada PLP no FRETILIN hatama ba iha Tribunal Rekursu no mos Kontestasaun neebe hatama ba iha Tribunal Primera Instansia kona-ba nomeasaun Prezidente Tribunal Rekursu (PTR) nian, PTR nia parte seidauk iha konhesimentu.
“Hau seidauk iha konhesimentu, tanba buat nee prosesu liu husi Sekretaria Judisial nia fo hatene mak hau foin hatene, hau labele koalia buat ida hau seidauk hatene, hau dehan hau hatene,” dehan PTR, Afonso Carmona ba jornalista sira iha Kaikoli, Segunda (12/05/2025).
Nia hatutan, kona-ba kontestasaun neebe hatama laos kontra PTR, maibe kontra Estadu Timor Leste, Prezidente, hanesan PTR sei taka ibun la koalia kona-ba kestaun rua nee.
Antes nee iha loron 8 fulan Maiu nee, Bankada FRETILIN no PLP hatama pedidu ba iha Tribunal Rekursu, hodi husu Tribunal Rekursu halo fiskalizasaun abstrata ba segunda alterasaun lei Organizasaun Judisiariu, neebe fo kompetensia ba Prezidente Republika hodi nomeia Prezidente Tribunal Rekursu, Afonso Carmona.
“Ohin Bankada FRETILIN no bankada PLP aprezenta pedidu ida ba Tribunal Rekursu, kona-ba lei numeru 04/2025 neebe foin lalais Parlamentu aprova Prezidente Republika promulga,” dehan Deputadu Joaquim dos Santos.
Nia hatutan, iha artigu 76 alinha A neebe iha artigu nee fo kompetensia ba PR atu nomeia PTR foun, konsidera norma nee viola konstituisaun, tanba nee mak husu ba iha TR halao nia knaar hanesan Supremu Tribunal atu julga norma nee, tanba tuir sira nia hanoin viola konstituisaun, no espera Tribunal sei julga tuir sira nia pedidu. No husu Tribunal atu halo fiskalizasaun abstrata.
Aleinde nee mos Juiza dezembargadora ida husi Tribunal Rekursu hatama petisaun inisial providensia kautelar inominada ba Tribunal Judisial Primera Instansia Dili iha loron 29 fulan Abril oras tuku 4:00 loraik, ligadu kona-ba PR nomeia Afonso Carmona asumi knaar hanesan PTR, iha loron 2 fulan Maiu nee, Tribunal halo ona sitasaun ba PR.
(ter)
