DILI, STLTIMORLESTE.com – Relasiona ho prosesu Fiskalizasaun Abastrata ba Lei Pensaun Vitalisia, too oras nee seidauk iha desizaun, tanba Juiz titular ba prosesu seidauk notifika parte sira.
“Kona-ba ida nee seidauk iha notifikasaun, entaun seidauk, tanba ida nee Juiz titular ba ida nee mak kaer, hau labele fo lai komentariu ba ida nee,” dehan Prezidente Tribunal Rekursu, Afonso Carmona ba jornalista sira iha Kaikoli, Kuarta (25/02/2026).
Nia esplika, kuandu iha desizaun PTR mos iha konhesimentu, maibe agora seidauk, tanba nee tenke hein too iha Juiz neebe titular deside desizaun.
Nia argumenta, husu estudante sira atu mantein kalma, tanba prosesu lao hela hodi hein nia rezultadu.
Iha fatin ketak, Jurista Sergio Dias Quintas dehan, fiskalizasau nee prosesu lao hela, tanba nee tenke pasiensia hodi hein desizaun.
“Hau nia hanoin fiskalizasun abstrata neebe hatama hodi haree kona-ba konstitusionalidade lei pensaun vitalisia nia prosesu lao hela, entaun estudante sira tenki kalma no pasiensia hein prosesu lao tuir nia transmitasaun,” dehan Sergio.
Nia hatutan, fiar katak too tempu ida Juiz prosesu sei fo nia desizaun, tanba tuir norma prosesual Juiz ida labele nega justisa, iha artigu 7 husi Kodigu Prosesu Sivil dehan katak, Juiz la bele rekuza halo audiensia, julgamentu ka desizaun ba kazu neebe ema ruma hatoo ba iha Tribunal.
Aleinde nee, Jurista Jose Maria Guterres dehan, prosesu neebe tama ona iha Tribunal, signifika sei lao tuir nia regra neebe iha.
“Hau fiar katak prosesu ida nee ita nia autor judisiariu sira sei deside iha tempu badak, tanba nee husi sira halao servisu neebe iha,” dehan nia.
Nia hatutan, Tribunal sei deside prosesu sira nee, tanba nee tau konfiansa ba sira atu halao knaar, hodi deside desizaun neebe tuir lei haruka.
(ter)
