DILI, STLTIMORLESTE.com – Tuir Visi Ministru Saúde ba Operasionalizasaun Ospitál (VMSOO), Flávio Brandão Mendes de Araújo husu ba Diretora Ezekutiva Ospital HoREX Baukau tenke kuda ai oan iha areador Hospital Baukau hodi fo mahon ba ambiente HoREX Baukau.
“Ita haree ambiente HoREX Baukau moos, maibe tenke kuda ai oan iha areador ospital laran, atu nunee fo mahon ba ita hotu, tanba rai manas demais,” hatete Visi Flávio Brandão Mendes de Araújo ba jornalista sira liu husi diskursu wanhira inaugura Uma Seguru ba Sobrevivente sira iha HoREX Baukau, Kinta (21/11/2024).
Nia dehan, HoREX Baukau bele akumula pasiente bara ho nia atendimentu neebe diak, maibe tenke kuda ai oan, atu nunee fo mahon ba ambiente iha ospital nee.
Iha fatin hanesan, Diretor Ezekutivu HoREX Baukau, Claudino Ximenes esplika, HoREX rai neebe ateru nee laos metan, maibe rai mutin, kuda ai oan la moris, maibe sira sei kuda ai oan para hodi fo mahon ba ambiente HoREX Baukau.
“Ami sei kontinua kuda ai oan sira nee iha ospital laran, ita haree agora ai neebe moris nee kuaze tinan 10 ona ami kuda iha nee, ai Kiik oan sira nee ami kuda iha nee ema naok hotu tiha, no animal sira mos mai estraga, nomos bee laiha atu rega ai oan sira nee, tanba nee kuandu bai loron ai oan sira ami kuda nee mate hotu,” nia informa.
Observasaun STL nia iha terenu, HoREX Baukau ambiente moos no lixu sira la soe arbiru, lixu sempre soe iha lixu fatin, ambiente fresku no saudavel, maibe ahi mahon laiha atu hamahon ospital nee.
(jen)
