DILI, STLTIMORLESTE.com – Fundasaun Mahein (FM) husu ba Governu, liu-liu parte relevante sira atu rigorozu lei kontrolu seguransa iha Timor Leste (TL), nunee bele prevene arma ilegal ka bala musan ilegal neebe fo trauma ba komunidade iha publiku tomak.
Informasaun sira nee hatete husi Diretor Ezekutivu, Fundasaun Mahein (FM), Nelson Carvalho ba STL iha nia knaar fatin Bairo dos Grilhos, Sesta (24/01/2025).
“Situasaun neebe ema deskonhesidu uza arma ilegal, akontese dala 4 ona. Hanesan Eis Ministu Interior (MI), Longuinhos Monteiro rai arma ilegal iha nia rezidensia, too lei absolve, ema deskonhesidu lori arma ilegal tama iha linha fronteira, tiru rezidensia eis Prezidente Republika (PR), Fransisco Guterres Lu’Olo, no tiru mos ba karreta kompanhia nian, aktu ida nee presiza buka tuir no investiga tuir lei haruka,” nia tenik.
Tuir Diretor FM, parte relevante sira, liu-liu Polisia Sientifika Investigasaun Kriminal (PSIK) ho Polisia Nasional Servisu Investigasaun Kriminal ( PNSIK) tenke buka tuir autor neebe tiru no uza arma ilegal, hodi halo paniku komunidade iha publiku, no parte relevante sira, liu-liu Parlamentu Nasional (PN) no Tribunal Rekursu (TR) tenke halo lei rigor ba kontrolu seguransa nian, nunee bele asegura aktu sira nee iha TL ho seguru.
Tanba lei rekonhese ema neebe iha direitu atu lori arma funu mak FALINTIL – Forsa Defeza Timor Leste (F-FDTL) ho Polisia Nasional Timor Leste (PNTL), maibe haree katak ema deskonhesidu balu mos kontinua uza arma ilegal hodi fo trauma no paniku ba publiku, nunee husi FM nia parte husu ba parte relevante sira atu kria lei neebe rigor, hodi asegura no kontrola seguransa iha Timor Leste.
Durante nee Komisaun B neebe trata Asuntu Negosiu Estranjeiru no Seguransa Defeza, Parlamentu Nasional (PN), Deputadu Natalino dos Santo hateten, husi parte seguransa hanesan PSIK ho PNSIK tenke halo investigasaun klean ba ema deskonhesidu balu tiru karreta husi Kompanhia Toyota, neebe para iha areadores Kompanhia Lisun foin lalais nee, tanba nee krime no fo paniku ba publiku.
Tuir Deputadu Natalino Dos Santos katak, insidente nee hanesan krimi organizadu ida, tanba presiza halo investigasaun neebe klean hodi buka tuir autor prinsipal sira neebe uza arma branka hodi fo trauma ba ema nia privasidade.
“Ita konsidera nee krimi no bele dehan krimi organizadu, entaun husu ba PNTL, liu-liu PNSIK no PSIK atu halo investigasaun hodi bele hatene karreta nee hetan tiru husi se,” nia sublina.
Nia hatutan, tuir lei Timor Leste iha deit instituisaun rua hanesan PNTL no F-FDTL mak bele kaer kilat, seluk nee labele.
Tanba nee, husu PNSIK ho PSIK atu halo investigasaun neebe lais hodi buk tuir autor prinsipal sira neebe mak tiru karreta, nunee labele halo tauk populasaun sira.
(EST 1)
