DILI, STLTIMORLESTE.com – Diretor Ezekutivu Fundasaun Mahein (FM), Nelson Belo kestiona kapasidade Ministru Interiór (MI), Francisco da Costa Guterres, liu-liu oinsa atu foti desizaun mesak hodi solusiona polemika vaga rekrutamentu membru Polisia Nasional Timor Leste (PNTL) foun 2025.
“Desizaun atu suspende ka anula nee tanba saida mak tenke hein Konselhu Ministru, tanba saida mak ministru hotu-hotu tenki hein desizaun Konselhu Ministru, entaun ministru hotu-hotu la hatene halo desizaun, entaun sira lori ba Konselhu Ministru mak halo desizaun ba sira”, hatete Diretor Ezekutivu Fundasaun Mahein (FM), Nelson Belo ba jornalista sira iha Komando Jeral PNTL Dili, Tersa (10/02/2026).
Nia informa, hanesan ministru uza kompétensia hodi rezolve polemika rekrutamentu nee.
“Tuir lo-loos ministru kompotente sira tenke halo desizaun, sira labele enak-enak deit diak deit, oituan-oituan sira lori ba Konselhu Ministru mak halo desizaun ba sira, ida nee diak los, sira labele halo hanesan nee, ministru mak tenke iha kompotensia ezekutivu para nia mak halo desizaun, se lori fali ba Konselhu Ministru nee ministru laiha kapasidade,” nia deklara.
Nia koalia, MI laiha kapasidade, tanba lamentasaun sira nee mai husi públiku, maibe Ministru Interiór lakohi rezolve problema ne’ebé akontese iha nia uma laran, hodi bele esplika prosesu nee hanesan aspetu politika.
“Labele dudu ba iha PNTL hanesan prosesu ida nee hakarak fase liman lakohi responsabalidade. Ministru tenke asume nia knaar katak, desizaun neebe mak nia persiza tenki foti, lalika hein Konselhu Ministru. Desizaun foti bainhira iha alegasaun mosu iha publiku makaas, entaun ida nee konkista atensaun politiku sira, entaun ministru podia halo desizaun, tanba saida tenki ba Konselhu ministru”, nia esplika.
Nia hatutan, Konselhu Ministru nee haree asuntu sira mais estratejiku, mais abrajante.
“Maibe ida neebe kabe ba ministeriu nee halo desizaun. Tanba kestaun rekrutamentu nee buat kiik, nee ministru bele uza nia kompétensia hodi rezolve ida nee, la prediza lori ba Konselhu Ministru, lae ministru sira buat kiik boot lori ba Konselhu Ministru, nee signifika ita ministru mas ita laiha poder ezekutivu”, nia afirma.
(jen)
