DILI, STLTIMORLESTE.com – Prosesu kona-ba membru Polisia Nasional Timor Leste (PNTL) neebe fo arma ba Xineza treinu tiru iha Likisa, iha loron 15 Setembru 2025, prosesu nee iha ona Ministeriu Publiku (MP), no iha ona faze investigasaun.
Tuir Prokurador Jeral Republika, Nelson de Carvalho katak, prosesu iha ona faze investigasaun, kona-ba lei internal kabe ba iha instituisaun, maibe kona-ba krimi nian iha investigasaun.
“Nia prosesu iha ona faze investigasaun, no iha sira nia instituisaun mos halao ona kona-ba lei internal sira nian karik iha sansaun ruma, maibe kona-ba prosesu krimi neebe iha hau rasik mos hateten klaru sei loke investigasaun hasoru ajente refere,” dehan PJR ba jornalista sira, hafoin remata audensia publika orsamentu Prokuradoria Jeral Repúblika ba 2026 iha Parlamentu Nasionál, Segunda (20/10/2025).
PJR esplika, prosesu refere tama ona iha Ministeriu Publiku, tanba nee atribui ba iha Prokurador titular ba prosesu hodi halo investigasaun.
Hatan kona-ba kazu seluk neebe ligasaun ho uza armas, se tama iha MP kuandu investigasaun termina sei haree.
Iha fatin ketak, Akademiku UNTL, Rafael De Jesus dehan, aktu sira hanesan nee presiza investigasaun, atu iha futuru labele halo tan.
“Hanoin presiza investigasaun, tanba iha ema ida lori armas signifika katak nia iha responsabilidade ba armas nee, no uza tuir nia regra neebe iha,” dehan nia.
Nia akresenta, ida nee sai hanesan ezemplu ba pesoal seguransa sira seluk, banhira armas iha liman tenke uza tuir regra no uza tuir saida mak regra husi Instituisaun hateten ona.
Tuir informasaun neebe antes nee iha katak, membru Corpu Seguransa Pessoal (CSP) husi Polisia Nasional Timor Leste (PNTL) ida fasilita arma kilat ba sidadaun estranjeiru Xineza balu, hodi halo modalidade treinu iha area Kaitehu, Suku Ulmera, Postu Admnistrativu Bazartete, Munisipiu Likisa.
Jornalista: Terezinha De Deus
Editor: Xisto Mendonça
