DILI, STLTIMORLESTE.com – Visi Diretor Asosiasaun (HAK), Antonino de Limas hateten, Prezidente Republika fo ona indultu ba kondenadu eis Padre Richard Daschback, maibe ba vitima sira indultu nee justu ba sira ka lae, importante mak ida nee.
Visi Diretor HAK, Antonino de Limas hatete, indultu Prezidente Republika halo tiha ona sei la dada, maibe importante nee mak ita nafatin kestiona indultu ba eis Padre Daschback, maibe ba vitima sira indultu nee justu ba sira ga lae.
“Indultu Prezidente ninia ba kondenadu eis Padre Richard Dascback, HAK rasik ami nia pozisaun hanesan ho sosiedade sira seluk, ami nia pozisaun hatete ba Prezidente Republika labele fo indultu ida livre ba Daschaback, karik kua deit fulan hira ida komutasaun pena nee reduz kastigu ida nee ita sei bele tolera,” katak Diretor HAK ba jornalista STL iha edifisiu HAK Farol, Dili, Kuarta (21/05/2025).
Nia salienta, dala barak nee iha desizaun politika, desizaun konsiderasaun umanu nian husi Prezidente Republika rasik uza nia kompetensia ida nee hodi deside fo indultu ba Padre Richard Dascbach.
Nia konta, tanba justisa ita sira laos la direita sente ita bele hatete indultu nee diak, tanba amu idade 80 ona, depois katuas ona ho kondisaun moras, maibe ho kestaun umanidade ita bele simu, agora pergunta mak nee, ba vitima sira simu dehan amu hetan ona kastigu tinan 2 ka 3 ida nee ba sira justu ka lae.
“Kestaun mak ida nee, karik Prezidente Republika husu ba vitima sira dehan nee justu ona ka sira dehan importante nia kumpri kastigu oituan ka barak neebe mak nia kumpri ona, katak kestaun idade bele hasai nia, lo-loos nee kadeia too mate maibe kestaun umanu bele perdua nian, ba HAK perguntas mak nee vitima sira sente indultu nee justu ba sira ka lae, ida nee deit maibe indultu depois livre,” dehan Antonino de Limas.
Nia deklara, lo-loos ba kazu sira seluk inklui kazu violasaun seksual, se lei alterasaun nee mak la hatete hanesan nee maibe ida uluk nee hatete, ida violasaun seksual nee seksional. Amu nee rasik kondenadu maibe seidauk kumpri metade mos laiha kastigu nee la too.
“Violasaun ida nee grave tebes, la merese atu hetan indultu, ita rejeita ida nee, ita nia hanoin no mos kolega sira seluk no sosiedade sira seluk ninia hanoin atu hatoo ba Prezidente atu tetu molok deside, maibe agora Prezidente fo tiha ona indultu ba kondenadu,” dehan Diretor HAK, Antonino de Limas.
(EST 1)
