DILI, STLTIMORLESTE.com – Madre Kongregasaun SSpS iha Aldeia Mota Quic no Cidara, Hera, selebra loron Juventude Nasional 12 Novembru ba dala 33 ho joven sira iha fatin refere, hahu iha loron 11 too 12 Novembru. Atividades nee ho objetivu atu hafanun fali espiritu joven loron ohin nian, atu oinsa bele moris tuir lo-loos sira nia obrigasaun hanesan joven diak ida, neebe bele apriende mos husi espiritu asu-wain masakre Santa Kruz nian.
Tuir Responsavel Joven, Me. Joana Soares SSpS, atividades nee ho nia objetivu atu hafanun fali espiritu joven loron ohin nian, atu oinsa bele moris tuir lo-loos sira nia obrigasaun hanesan joven diak ida, neebe bele aprende mos husi espiritu husi asu-wain masakre Santa Kruz nian.
“Ami Madre Kongregasaun SSpS hela iha Aldeia Mota Quic no Cidara sai hanesan bairu kiik ou Komunidade Igreja Basico (KIB) ida iha aldeia nee nia laran. Ami nia uma formasaun novisiado laos deit hala’o iha laran, maibe iha mos tempu ba vizita no anima sarani inklui joven sira. Cidara sai hanesan fatin hodi komemora loron Juventude Nasional 12 Novembru ou Memoria Masakre Santa Krus ba dala 33 neebe hahu iha dia 11 too 12 Novembru. Atividade nee ho nia objetivu atu hafanun fali espiritu joven loron ohin nian, atu oinsa bele moris tuir lo-loos sira nia obrigasaun hanesan joven diak, no bele apriende mos husi espiritu asu-wain masakre Santa cruz nian. Lema neebe foti husi mensajen Santu Padre ba joven sira iha CCD: “Foinsa’e sira gosta hakilar no halo barulhu” hanesan pontu importante iha eventu ida ne’e ajuda joven sira hodi reflete didiak saida lo-loos signifika husi hakilar ou barulhu lori ba buat diak ou halikar no barulhu ba buat neebe ladun diak,” dehan Madre Joana liu husi komunikadu neebe STL asesu Kuarta nee (13/11/2024) iha Osindo.
Madre hatete, atividades ida nee halibur joven 400 resin, neebe mai husi Parokia Hera laran tomak inklui estudante Politekniku besik 200, nomos husi Parokia vizinhu hanesan Bedois.
Atividade neebe halao mak joven sira partisipa iha kalan reflesaun, drama, jogu amizade, animasaun, aksaun caritativa, Santa Misa no prosesaun hadulas Paroquia Hera, no taka ho kari aifunan iha Tasi Bedic.
Iha biban nee Vigario Jeral Arkedioseze Dili, Graciano Santos Barros husu ba joven besik 400 resin nee katak, joven sira atu kria nafatin unidade no estuda didiak para aban bainrua bele sai ema.
Amu dehan, presiza susar uluk mak foin kontenti, maibe realidade agora hatudu kontrariu katak barak mak hakarak kontenti uluk depois terus.
“Bainhira rona liafuan furak husi Amu Graciano, joven sira sente haksolok no arepende. Wainhira sira tama iha grupu kiik, hodi reflete no fahe kona-ba perguntas balun neebe komisaun prepara, maioria mak ekspresa sai sira nia sentimentu,” tenik Madre nee.
Nia hatutan, husi sira nia resposta neebe aprezenta iha grupu boot hatudu katak, maioria konflitu iha Hera laran tomak mak menus unidade, tanba envolve iha grupu arte marsiais oin-oin.
Tanba nee sira mos sujere katak konflitu neebe iha sei bele muda neineik wainhira husi Igreja, kada kongregasaun, Governu no inan-aman kolabora hamutuk hodi kria nafatin atividades sira hanesan ne’e iha eventu saida deit, laos iha 12 Novembru mesak.
(dom)
