DILI, STLTIMORLESTE.com – Forum Komunikasaun ba Feto Timor Leste (Fokupers) apresia ba servisu Polisia Nasional Timor Leste (PNTL) neebe mak kaptura ona autor halo violensia hasoru feto no labarik feto sira iha rai laran.
Kestaun nee hatoo husi Rio Aroujo ofisial Advokasia Fokupers hanesan mos portavoz liu husi Konferensia Imprensa iha salaun Fokupers, Tersa (15/07/2025).
“Fokupers apresia ho Komandante Jeral Komisariu Jeral Polísia, Henrique da Costa ho membrus tomak, liu-liu servisu informasaun Polísia, VPU no PCIC neebe hatudu servisu profisionál no seriedade ba halo identifikasaun no kapturasaun ba aktu violensia sira, liu-liu violensia neebe kontra feto no labarik feto iha Timor Leste. Nunee husu ba PNTL no PCIC atu nafatin halo atuasaun ho imediata ba krimi publiku tuir lei haruka, liu-liu knaar PNTL no PCIC nian neebe ho severidade,” dehan portavoz.
Nia dehan, ba entidade hotu-hotu, linhas ministerial sira iha Governu, autoridade munisipiu sira, sosiedade sivil ho igreija no konviksaun relijiozu sira hotu atu haforsa koordenasaun no kolaborasaun ho konsistente no komprensivu, atu bele fo protesaun diak liu ba feto no labarik sira hosi forma violensia oioin, nunee mos kria sosiedade ida neebe seguru no justu liu.
“Fokupers hamriik hamutuk ho vítima sira no feto Timoroan tomak iha luta hasoru violensia. Ami bolu sosiedade sivíl, mídia no parte hotu-hotu atu labele nonok. Violensia hasoru feto ida mak violensia hasoru umanidade tomak. Mai ita hamutuk tane Timor Leste ida respeita direitu umanu, igualdade jeneru no livre husi violensia,” katak nia.
Portavoz dehan, Justisa ba vítima tenke tane aas. No Feto no labarik-feto iha direitu atu moris ho seguru no dignidade.
(eme)
