DILI, STLTIMORLESTE.com – Forum Komunikasaun Feto Timor Leste (Fokupers) hamutuk ho parseiru realiza Kolokiu ho tema “Asegura Feto Nia Direitu ba Rai Hodi Promove Ekonomia Feto no Familia”.
Diretora Fokupers, Domingas Domingas Afonso Amaral hatete ba jornalista STL iha salaun Delta Nova, Sesta nee (18/07/2025) katak, atividade kolokiu ida ohin mai ho tema ida asegura feto nia direitu ba rai no propriedade hodi promove ekonomia feto no familia.
“Tanba sa mak Fokupers hanoin dehan tema ida nee sai importante, tanba ita hanoin katak bainhira feto ida asesu ba rai hodi bele halo nia vida ekonomia nia sei kontribui ba dezenvolvimentu nasaun nia liu-liu ekonomia rai doben Timor Leste no nia mos komesa livre husi violensia no hakotu nia aan husi siklu violensia neebe feto no labarik sira hasoru iha familia,” dehan Diretora.
Diretora dehan, atividade nee hetan suporta husi Word Vision TL, Oxfon TL nomos Uniaun Europeia no iha kolokiu importante ida nee Fokupers laos servisu mesak maibe hamutuk ho Sekretariu Estadu ba Igualdade nuudar makina estadu atu, nunee SEI hamutuk Fokupers bele kontinua halo advokasia ba prevene no responde ba violensia hasoru feto no labarik.
Aleinde nee Fokupers servisu parseria hamutuk ho Sekretaria Estadu Igualdade no hetan suporta finansiamentu husi OXFAM Timor Leste, World Vision Timor Leste no UniaunEuropeia realiza kolokiu ida nee ho objetivu atu haforsa feto sira nia independensia ekonomia, promove feto sira nia direitu no buka dalan hodi garantia sira nia asesu ba iha oportunidade neebe eziste iha sira nia komunidade, nunee bele asegura katak feto sira empoderada, livre husi violensia no bele foti desizaun ba sira nia aan rasik no sira nia familia.
Diretora dehan, kolokiu nee mos hanesan oportunidade atu lori feto sobrevivente no grupu feto benefisiariu hodi bele partilha esperiensia pratika diak sira, susesu no dezafiu neebe sira hasoru hodi buka aprende ba malu no konekta grupu feto sira ho parseirus interesante sira hotu, tantu husi Governu, setor privadu, ajensia internasional, organizasaun nasional no internasional, no media hodi kontribui ba prevensaun no responde ba violensia bazeia ba jeneru ho servisu neebe integradu, multisetoral no sustentavel.
Nunee mos Olga da Costa Monteiro, Diretora Nasional Polítika Igualdade Jeneru (DNPIG) hatutan, eventu kolokiu nee asegura feto nia direitu ba rai hodi promove ekonomia deto no família.
“Asesu hanesan ba rai no propiedade hanesan direitu umanu neebe konsagra iha Konstituisaun Repúblika Demokraatika Timor Leste artigu 16 no 17 kona-ba direitu no obrigasaun hanesan iha setor hotu no labele halo diskriminasaun ba ema ida tanba ninia koor, rasa, estadu sivíl, jeneru, identidade jeneru, origin, estadu sosial no ekonomia, polítika ka konvisaun ideolojia, relijiaun, edukasaun ka kondisaun mental ka fízika ruma. Konvensaun Internasional sira inklui Konvensaun Halakon forma Diskriminsaun sira hasoru feto neebe TL asina no ratifika sai mos enkuandramentu legal neebe proteje direitu feto sira nian,” katak Diretora.
Aleinde nee Sekretaria Estadu ba Igualdade, Elvina Sousa Carvalho nia naran hatoo parabens ba inisiativa Fokupers, OXFAM ho apoiu Uniaun Europeia nian neebe organiza ona Kolokiu ida nee, no hein katak rezultadu sira neebe hetan sei haforsa ema hotu nia esforsu diak liu tan hodi promove feto sira liu-liu feto rural.
Partisipante neebe partisipa iha kolokiu nee husi parte Governu, sosiedade sivil, Xefe Suku, Polisia Nasional Timor Leste nomos partisipante seluk tan.
(eme)
