DILI, STLTIMORLESTE.com – Forum Komunikasaun Feto Timor Leste (FOKUPERS) hamutuk ho parseiru realiza dialogu publiku, oinsa halo prevensaun hapara violensia hasoru feto no promove igualdade jeneru no asegura feto nia direitu liu husi empoderamentu ekonomia.
FOKUPERS parseria ho World Vision Timor-Leste no Fundasaun Esperansa Enklave Oekusi (FEEO), servisu hamutuk hodi fo apoiu ba feto sira iha komunidade rural, liu husi projetu ida-neebe hanaran Promosaun Feto Liu husi Empoderamentu Ekonomiku no Direitu (POWER).
Projetu nee foka liu ba partisipasaun feto sira nian iha dezenvolvimentu ekonomiku liu husi introduz atividade poupansa ba transformasaun, harii grupo agrikultor no fo apoiu emprezarial ba grupu agrikultor sira liu-liu feto no grupu marginalizadu sira inklui advokasia iha ambitu selebrasaun loron importante sira.
Iha ambitu komemorasaun kampanha loron 16 ativizmu kontra violensia hasoru feto tinan 2024, FOKUPERS hamutuk ho World Vision Timor Leste sei realiza Diálogu Publiku hamutuk prevene no hapara violensia hasoru feto hodi promove Igualdade Jeneru no asegura feto nia direitu humanu liu husi empoderamentu ekonomia. Objetivu husi atividade ida nee atu hasae konsiensia publiku hodi hapara violensia hasoru feto no asegura kompromisiu estadu ba alokasaun orsamentu nomos politika neebe sensivel ba jeneru liu husi empoderamentu ekonomia feto Timor Leste.
Iha biban nee Sekrtariu Estadu ba Igualdade (SEI), Elvina Sousa Carvalho ba jornalista sira iha salaun Delta Nova, Segunda (09/12/2024) hatete, atividade ohin organiza husi FOKUPERS nuudar atividade dialogu ida hodi bele halibur estudante no sosiedade sivil hotu atu bele halo dialogu meius no prevensaun violensia bazeia ba jeneru.
“Atividade ohin nee atu prienxe mos loron 16 kampanha ativizmu kontra violensia hasoru feto no labarik feto, SEI ho ondra tebes partisipa no orgulhu ho sosiedade sivil sira inklui FOKUPERS neebe mak hamutuk ho lina ministerial sira hodi implementa PAN Violensia bazeia ba janeru, hodi halo sira nia atividade ka promove atividade hodi bele hasae konsiensia komunidade, nomos halo atividade hotu hasae konsiensia ema nia konaba violensia bazeia ba jeneru ida nee eventu ida importante,” dehan SEI, Elvina.
Nia dehan, durante loron 16 nia laran SEI hamutuk ho parseru Nasional no internasional promove atividade hotu hodi bele hasae konsiensia povu nia, ida nee laos halo deit iha Dili laran maibe halo mos iha Munisipiu sira no postu sira, no husi SEI rasik halo atividade iha Ossu Builale ida nee hanesan mos ho atividade hodi halibur komunidade hodi halo dialogu.
Nunu Governu konstitusional iha komprometidu kria sosiedade ida neebe mak inklsivu, nomos promove politika sira lei no asegura orsamentu jeral estadu atu bele kontribui ba iha redusaun, no halakon violensia bazeia ba jeneru no kualker tipu violensia neebe feto no labarik hasoru.
Nunee mos Diretora FOKUPER, Domingas Afonso Amaral hatutan, atividade ida ohin hola parte hodi selebrasaun kampanha loron 16 ativismo konta violensia hasoru feto no labarik feto, no tema nasional ba loron 16 tinan 2024 tema mak mai hamutuk prevene no hapara violensia hasoru feto no labarik feto iha Timor- Leste.
(eme)
