DILI, STLTIMORLESTE.com – Husi 2015 too 2025, Forum Komunikasaun ba Feto Timor Leste (FOKUPERS) rejistu kazu asediu seksual hamutuk 7.
Liafuan nee haktuir husi Diretora FOKUPERS, Domingas Afonso Amaral ba jornalista iha nia knaar fatin Farol, Kuarta (08/10/2025).
Nia hatete, kazu neebe iha Fokupers nafatin fo asistensia ba kliente, atu nunee la sente mesak hodi kontinua prosesu nee ba oin.
“Bazeia ba dadus neebe mak iha husi 2015 too mai 2025 iha kazu asedu seksual neebe mak FOKUPERS rejistu hamutuk 7,” dehan nia.
Nia hatete, iha 2025 Fokupers rejistu kazu ida, nee vitima mak mai hatoo keixa ba FOKUPERS. Iha esperensia kazu ida neebe mak Fokupers akompanha ho triste, tanba kazu asedu seksual neebe komete husi Diretor Eskola iha Eskola Sekundaria ida, maibe ikus nia sansaun disiplinar ho numeru eskrita deit.
“Ita hatene asedu seksual neebe nia komete kazu ho tipu oin tolu neebe halo aktu ba nia estudante, maibe ikus rona katak desizaun husi instituisaun nomos komisaun Funsaun Publika fo diretor refere la justu, tanba ho sansaun disiplinar por eskrita deit,” dehan Diretora.
Nunee mos Portavos Rio Aroujo hatete, dezafiu neebe mak durante nee FOKUPERS hasoru ho parseria serbisu sira mak haree asedu seksual no bainhira iha prosesu akompanhamentu too nivel prosesu legal nia iha faze sansaun displinar deit nee sai dezafiu ba sira.
”Tanba ba sa mak dehan dezafiu tanba orsida iha sansaun displinar neebe mak parte kompotente fo ba autor sira nee laos seriedade. Hanesan kazu ida neebe mak ita akompanha nia gravidade husi kazu nee nia tama ona parte kriminal nia, maibe saida mak akontese parte husi funsaun publika fo sansaun ba iha manorin nain intermus por eskrita deit laiha sansaun ruma neebe mak atu fo hanesan menyesal ka nia nee des-obidese regra ka buat ruma nee laiha entau nee hanesan oportunidade ida fo espasu ba ema seluk, no fo espasu ba nia hanesan autor kontinua halo fali iha fatin neebe lahanesan, tanba sansaun neebe fo samada atensaun deit katak asedu seksual nee ladiak. Bainhira hanesan nee deit entau nafatin iha oportunidade no espasu ema seluk bele halo no nia mos bele halo fali iha fatin seluk,” dehan Portavos nee.
Iha rekomendasaun husu liu liu ba implementador lei sira hanesan PDHJ, monitorizasaun nee importante hodi bele haree prosesu implementasaun ba prosesu sira no prosesu investigasaun katak bainhira liga ho asedu seksual nee krime publiku no haree husi kazu grave previstu iha kodido penal, entau prosesu sansaun tenke tuir duni no asegura katak satisfasaun entre vitima ho autor nee tenke iha.
Nunee mos Koordenador JSMP Flora S. Menezes dehan, liga ho kazu asedu seksual neebe mak akontese iha UNTL oras nee nia prosesu lao hela tanba hein deit desizaun. Tanba iha lei funsaun publika la autoriza halo asedu seksual tanba nee hein prosesu.
Jornalista: Emerenciana Pinto
Editora: Domingas Gomes
