DILI, STLTIMORLESTE.com – Relasiona ho folin billete aviaun neebe mak konsidera folin sae makaas, Ministru Trasporte Komunikasaun (MTK), Miguel Marques Gonsalves Manetelu hateten, ministru la ba husu empreza Aero Dili atu hatun folin billete aviaun nian, tanba kompanhia privada, ema nia investimentu, too agora seidauk iha opsaun ruma.
Antes (17/03/2025) nee mos iha uma fukun Parlamentu Nasional, Deputadu Natalino dos Santos preokupa katak Governu tau tiha subsidiu ba aviaun Aero Dili maibe billete aviaun folin kontinua sae makaas.
“Kompanhia dehan se folin la hanesan, neebe atu taka ona nee, ita atu dehan hanusa, nee ema nia kompanhia privada, ema nia investimentu, ita too agora seidauk iha opsaun seluk ida kona-ba ida nee, dala ida tan ministru la ba husu ba nain Aero Dili Lourenço para hatun tiha folin billete,” MTK, Miguel ba STL iha Palasiu Governu, Kuarta (19/03/2025).
Nia haktuir, iha parte seluk mos sidadaun sira ezije atu hatun folin billete aviaun, maibe sei iha prosesu balu lao para haree oinsa mak bele loron ida kustu ida nee bele tun.
“Neebe dala ruma ita hanoin Timoroan sira, tanba halo hela investimentu iha neeba, maibe iha parte seluk sidadaun sira ezije para billete aviaun nee folin tun, neebe sasan nee ita haree hela mas ida nee kompanhia privadu, agora ita koalia dehan buat ruma tan nee orsida ema hatete dehan nia kompanhia taka,” hatete governante nee.
Governante nee haktuir, Governu Timor Leste liu husi MTK husu autoridade ba aviaun sivil nee laos atu ba hatun folin billete aviaun nian.
(EST 2)
