BAUKAU, STLTIMORLESTE.com – folin foos saka kilograma 25 iha Suku Guruça, Postu Administrativu Kelikai, Munisipiu Baukau, sae too US$ 22.00 kada saka.
Informasaun nee hatoo husi konsumidor, Juvita Mia Amaral husi Suku Guruça ba jornalista sira, bainhira partisipa iha selebrasaun loron Feto Timor Leste ba dala 48, iha Suku Lakuliu Kelikai, Kinta (07/11/2024).
“Ami nia Suku Guruça Aldeia 4 sae ba leten nee, Aldeia Eu-ofa, Faewa, Saebere nee faan ba US$ 20.00, ba fali ba hau nia Aldeia Uadaboru nee US$ 22.00,” nia informa
Nia esplika, foos folin kontinua sae iha Suku Guruça, tanba empreza sira neebe lori ba faan iha Suku refere, foos hanesan saka marka Tuna no Gostu Loos kg 25 kada saka US$ 17.75 no saka marka Amor de Mae US$ 19.75.
Nia fundamenta, husi folin foos neebe empreza sira aplika iha Suku refere, konsege komunidade sira sosa hodi faan tutan iha Aldeia 3 hanesan Faewa, Eu-ofa no Saebere kada saka kg 25 US$ 20.00, enkuantu faan iha Aldeia Uadaboru sae too US$ 22.00 kada saka, tanba Aldeia refere transporte hanesan karreta labele asesu hodi lori foos too iha area refere.
Aleinde folin foos, nesesidade baziku hanesan mina tein litru 5 sira, Bilomi US$ 9.25, Sania US$ 7.75, enkuantu folin nesesidade baziku seluk folin kontinua normal.
“Ami preokupa no triste, tanba ema neebe servisu iha osan hodi sosa, ema neebe la servisu sente susar. Husu parte relevante hatun netik foos nia folin,” nia espresa.
Konsumidor nee rekomenda ba parte relevante atu fo solusaun ba folin foos no mina tein neebe daudaun sae iha baze, hodi komunidade iha kbiit atu sosa, tanba komunidade balun neebe daudaun laiha salariu kada fulan difisil tebes atu sosa kotu foos hodi auguenta ba nesesidade, kompara ho komunidade neebe hetan salariu kada fulan.
Habitante Suku Guruça nee mos triste ho kompromisu Governante sira neebe antes nee hateten sai ba publiku liu husi media nasional sira neebe hatete katak, inisiu fulan Novembru 2024 folin foos tun, maibe realidade seidauk akontese.
Ligadu folin foos sae, tanba kauza husi estrada rural ligasaun husi Suku Guruça ba Aldeia 4 refere neebe katak, aat no grave, STL tenta konfirma Xefe Suku Guruça, maibe laiha dadus ba folin foos, enkuantu Administrador Postu Kelikai, laiha tempu atu fo komentariu, tanba okupadu ho selebrasaun loron Feto Timor Leste ba dala 48, neebe Sekretaria Estadu ba Igualdade realiza iha Kelikai.
(EST 2)
