BAUKAU, STLTIMORLESTE.com – Folin nesesidade bazika iha merkadu Vila Nova Munisipiu Baukau mantein ho presu neebe aplika iha fulan Novembru 2025, maibe menus kompradores.
Nain ba loja Gemea Bernardo Domingos Guterres esplika, preparasaun ba festa Natal sira iha tinan hirak liu ba, folin nesesidade bazika iha merkadu Baukau sira sempre aumenta, tanba bazeia ba folin neebe aplika husi empreza sira iha Dili, maibe preparasaun ba festa natal tinan 2025 folin nesesidade baziku mantein la karun hanesan tinan hirak liu ba, maibe menus kompradores.
“Sasan nesesidade bazika nia folin ami faan mantein ho presu fulan Novembru nian, maibe laiha kompradores, hanesan festa Natal uluk nee rame, sasan karun maibe ema sosa dala ruma lori husi Dili mai loron 2 ba 3 hotu ona, agora nee susar tanba sasan hotu hotu la folin, agora besik ona Natal sasan ema la hola dala ruma orsamentu nee mak susar,” Bernardo hateten ba STL, iha Vila Nova, Baukau, Kinta (18/12/2025).
Nia argumentu, kauza husi menus kompradores ba sasan nesesidade bazika, deskonfia kosumidores sira menus finanseiru neebe kauza husi Orsamentu Jeral Estadu aprova kada tinan seidauk fo benefisiu diak ba Povu. Tanba iha tinan hirak liu ba komunidade agrikultores sira iha festa natal tinan foun nakonu iha loja, kompra sasan nesesidade bazika hodi prepara ba selebra festa natal hamutuk ho familia.
Maibe ba festa Natal iha tinan nee fos neebe uluk liu ba aplika kada saka kilograma 20 US$ 12.50 no agora US$ 11.50, masi midar uluk karun atual kada saka US$ 35.00, manu tolun daudaun kada rak US$ 5.00, mina tein marka bimoli litru 5 kada jereken US$ 7.00, mina tein marka seluk kada jereken litru 5 folin US$ 5.00, Kafe Timor kada set US$ 2.00 no masi midar falun kilograma ida US$ 1.00.
Husi folin ba nesesidade bazika sira nee hahu aplika kedas antes fulan Novembru 2025 nee, maibe menus kompradores atu kompra hahu kedas antes selebra loron finadu tinan nee.
“Foos nee mak semakin tun maibe la folin liu hanesan minuman sira nee besik natal ona mais ema la sosa, finadu foin lalais nee mos ema la dun sosa hanesan finadu tinan kotuk, neebe uluk ema hotu hakarak diverte iha natal, agora nee susar, mai sosa la hanesan ona uluk,” Bernardo katak.
Iha fatin hanesan konsumidor Ceseltina Ximenes sublina, folin nesesidade bazika husi loja sira neebe eziste iha Vila Nova Baukau, folin mantein ho presu fulan Novembru nian, maibe folin foos kada hahu reduz.
“Uluk manu vitoria 25 kilo ita sosa saka ida US$ 18.50, maibe agora iha loja balu tun ona ba US$ 17.00 no US$ 17.50, maibe mina tein bimoli nee mak nafatin US$ 7.00, manu tolu rak ida US$ 5.00, masi midar 5 kilo US$ 5.00, kafe pak ida nafatin US$ 20.00,” Ceseltina informa.
Konsumidor nee katak, husi folin nesesidade bazika nafatin fo impaktu ba komunidade sira, tanba komunidade balu menus finanseiru atu kompras, maibe kestaun nesesidade tenke kompras.
“Presiza tau atensaun ba folin nesesidade bazika sira nee, diak liu hatun tan folin foos no mina, tanba nee mak importante liu, dala ruma ita la hatene iha komunidade kbiit laek sira susar atu sosa, maibe sira tenke buka sosa tanba nesesidade,” dehan nia.
Konsumidor nee konsidera, preparasaun ba festa Natal kada familia ida iha ona planu rasik atu selebra, laos kestaun la halo kompras iha loja atu la selebra festa Natal, maibe selebra festa Natal importante ba familia ida mak partisipa iha misa hodi hetan bensaun.
Entretantu husi STL nia rekolha folin nesesidade bazika, liu liu foos, mina tein, masi midar no kafe husi loja ba loja iha area Vila Nova nota katak, kada loja aplika folin ba nesesidade bazika refere kauze atu hanesan no informasaun neebe parte loja nain sira relata folin nee mantein antes fulan Novembru 2025.
Jornalista: Tomas Reis
Editora: Carme Ximenes
