DILI, STLTIMORLESTE.com – Forum Organizasaun Naun Governamental Timor Leste (FONGTIL) husu Ministeriu Saùde halo investigasaun klean ba pesoal saude neebe abandona pasiente Januario Soares too lakon vida.
Diretor FONGTIL, Valentim da Costa Pinto hateten, akontesimentu nee hanesan neglijensia ba atendimentu, tanba mediku mak fo orientasaun ba estajiadu hodi bele atende ba pasiente.
“Horikalan nee iha tendensia kona-ba neglijensia “Kekelayanan” ida neebe ke mediku sira halo, halo nusa mak ita bele fo orientasaun ba ema estajiu ida bele tau matan ba pasiente ida, estajiu nia knaar ka servisu hanesan infermeira, nia mai atu aprende, quer dizer que nia seidauk bele kontaktu ho pasiente,” hateten Valentim ba jornalista sira iha nia knaar fatin Farol, Dili, Segunda (14/04/25).
Diretor FONGTIL nee afirma katak, akontesimentu nee hanesan orientasaun ida neebe mak neglijensia, tanba nee presiza halo investigasaun hodi bele haree tanba sa akontese, se lae bele afeta ba komunidade sira ka pasiente sira seluk bele lakon konfiansa hodi ba iha hospital.
Tuir nia, hospital uniku fatin neebe mak ema atu hetan rekuperasaun, laos loron-loron rasio mortalidade kontinua sae, maibe ita nunka fo hatene ba publiku tanba sa.
Nunee nia parte husu Ministeriu Saude halo investigasaun no husu ba Parlamentu Nasional tenke halo vizita urjente, labele tebe rai ho imi nia kestaun politika iha Parlamentu Nasional.
Nia hatutan, Ministeriu Saude tenke halo intervensaun urjentemente ba funsionamentu HNGV, saida mak la diak iha hospital mak parlemnetu mos vizita no Primeiru Ministru mos vizita, maibe tanba sa mak sasan hirak nee laiha mudansa, presiza buat ruma iha neeba tenke defini, tanba nee mak sai kauza hodi halo funsionamentu hospital nee lao la diak .
Valentim fundamenta tan katak, iha hospital ekipamentu sira balu hahu ona avaria, nunee jestaun mos hahu lao la diak no fiskalizasaun husi parlamentu sira halo nafatin, tanba sa mak Ministeriu Saude la bele kontinua halo mudansa.
(EST 3)
