DILI, STLTIMORLESTE.com – Forum Organizasaun Noun Governamentu Timor Leste (FONGTIL) husu ba Komisaun Anti Korrupsaun (KAK) atu halo investigasaun klaru ba kompanhia neebe kaer projetu ba estasaun pasajeiru hein karreta (halte), tanba uza osan kuaze rihun US$ 96 ba konstrusaun refere.
Haktuir Diretor Ezekutivu husi FONGTIL, Valentim da Costa Pinto “Coco” ba STL iha nia knaar fatin Kaikoli, Sesta (24/01/2025).
“Ita husu KAK tenke halo investigasaun ba kompanhia neebe halo konstrusaun, liu-liu halo fatin halte, tanba kada fatin ka unit ida gasta US$ 9.600, entaun halo konstrusaun halte unit 10 iha sidade Dili, orsamentu US$ 96 mill kuaze utiliza orsamentu estadu US$ 100 mill, nunee husu parte relevante sira atu halo investigasaun klaru,” dehan nia.
Tuir nia, estasaun ka fatin halte nee laos konstrusaun permanente, maibe temporaria deit, bele uza orsamentu montante boot, KAK tenke halo investigasun klaru, nunee publiku bele hatene, tanba konstrusaun refere sai preokupasaun boot iha Estadu Timor Leste.
Diretor nee dehan, Governu tenke halo jestaun neebe diak, hodi atinji ba mehi ida efisiensi no efikasia nian, hodi nakloke kontabilidade no promove kona-ba jestaun finansa neebe diak liu.
Konstrusaun daudaun nee lao ona, maibe laos konstrusaun permanente no perfeitu, tanba nee uza deit besi ba tempu temporariu nian, maibe gastu neebe boot. Nee mak husi parte Sosiedade Sivil husu atu KAK tenke halo investigasaun no baze ruma, atu klarifika ba publiku ho serteza, tanba nee orsamentu estadu nian.
(EST 1)
