DILI, STLTIMORLESTE.com – Forum ONG Timor Leste (FONGTIL) la aseita Governu kontinua suspende atividade Grupu Arte Marsias (GAM) no Grupu Arte Rituais (GAR), tanba grupu sira la fo ameasa ba estabilidade.
Diretor FONGTIL, Valentim da Costa Pinto hateten, nia parte la aseita Governu kontinua suspende atividade GAM no GAR, tuir lo-loos nee Governu kontinua asegura atividade GAM-GAR tenke eziste nafatin no orienta grupu sira nee hanesan modalidade desportu ida.
Tuir nia, juventude sira nee hanesan rekursu nasaun nia, tanba saida mak governu kontinua suspende.
“Grupu Arte Marsias no Arte Rituais nee la ameasa ba rai nee, la fo ameasa buat ida, Governu falha ninia autoridade atu maneja ita nia joven sira neebe hallibur aan iha Grupu Arte Marsias no Arte Rituais, neebe tuir lo-loos orienta sira sai hanesan modalidade desportu,” hatete Valentim da Costa Pinto ba jornalista sira iha edifisiu HAK, Sesta (04/04/2025).
Nia hatutan, konfrontu entre Grupu Arte Marsias no Arte Rituais nee ninia persentajen kiik los kompara ho kazu violensia domestika, tanba nee tuir lo-loos Governu liu husi Ministeriu Juventude Desportu Arte no Kultura (MJDAK) no Komisaun Reguladora Arte Marsias lo-loos orienta grupu sira nee hodi hamorin nasaun nia naran liu husi partisipa iha kompetisaun internasional sira.
“Lo-loos nee Ministeriu Joventude Desportu Arte no Kultura iha hodi halo knaar ida nee, loke tiha Komisaun Reguladora Arte Marsias maibe la funsiona, lo-loos nee avalia, laos ba fali suspende fali atividade Grupu Arte Marsias nee,” tenik nia.
Molok nee Governu liu husi reuniaun Konselhu Ministru aprova rezolusaun neebe aprezenta husi Primeiru Ministru (PM), Kay Rala Xanana Gusmão atu kontinua suspende atividade Grupu Arte Marsias no Arte Rituais too fulan Dezembru 2025.
“Konselhu Ministrus aprova projetu Rezolusaun Governu, neebe aprezenta husi Primeiru Ministru, Kay Rala Xanana Gusmão, hodi prolonga suspensaun ba ensinu aprendizajen no pratika artes marsiais no taka temporariu ba fatin no instalasaun hotu-hotu neebe destinadu ba ensinu aprendizajen no pratika artes marsiais too loron 31 fulan-Dezembru tinan 2025,” haktuir nota komunikadu neebe STL asesu husi media PKM.
Governu kontinua deside suspende atividade Grupu Arte Marsias no Arte Rituais bazeia ba Rezolusaun Governu n. 45/2023, loron 10 fulan-novembru, neebe maka prolonga ona hosi Rezolusaun Governu n. 17/2024, loron 24 fulan-Abril no n. 60/2024, loron 7 fulan-novembru.
(alb)
