DILI, STLTIMORLESTE.com – Forum Organizasaun Naun Governamental Timor Leste (FONGTIL) hamutuk ho East Timor Coffe Institute (ECTI) no Universidade of Wisconsin Madison nomos Universidade Nasional Timor Lorosae (UNTL) realiza workshop hodi hasae kapasidade lider sosiedade sivil sira.
Diretora Asuntu Publiku Embaixada Estadus Unidos Amerika iha Timor Leste, Diana Braunschweig dehan, sente ondradu hodi partisipa iha workshop kona-ba oinsa hasae kapasidade lider sosiedade sivil sira.
“Hau Diana Braunschweig, Diretora Asuntu Publiku iha Embaixada Estadus Unidus Dili, hau nia onra duni atu simu ita boot sira iha workshop ohin nian,” dehan nia liu husi diskursu iha salaun Hak, Tersa (12/08/2025).
Nia hatete, organizasaun sosiedade sivíl, hanesan baibain halao knaar vital ida iha TL no iha mundu tomak. Apoia sosiedade sivíl laos deit hametin komunidade sira, ida nee kona-ba haburas koezaun sosial, fo kbiit ba lideransa sívika no dudu kresimentu ekonomiku no prosperidade neebe fahe.
“Sosiedade sivíl mak ruin kotuk lo-loos ba demokrasia. Bainhira ita fo kbiit ba OSC sira, ita hametin reziliensia demokratiku. Amerika nia movimentu sira iha baze forma ona ita nia nasaun liu husi divulgasaun komunitaria no envolvimentu síviku. Iha nee iha TL, OSC sira halao hela servisu notavel hodi promove inkluzividade no estabilidade iha imi nia demokrasia joven no vibrante. Ida nee reflete valor sira neebe fahe husi ita nia nasaun rua no destaka papel krítiku husi responsabilidade sívika hodi harii sosiedade sira neebe forte no unifikadu,” katak nia.
Nunee mos Diretor FONGTIL, Valentim Pinto hatete, atividade ohin hamutuk ho akademiku organiza formasaun loron rua husi 12 to 13, hodi hasae kapasidade lider sosiedade sivil sira.
“Atividade ohin nee FONGTIL hanesan parte ida neebe hamutuk ho akademia kafee Ermera, UNTL ho Universidade Wisconsin Madison neebe ami organiza hela formasaun loron rua loron ohin no aban no aban iha Ermera,” katak nia.
Diretur nee hatete, formasaun ba lider husi organizasaun husi membru Fongtil nia tuir sesaun ida nee, atu bele aprende diak liu tan oinsa mak bele forma rede serbisu iha rejional nomos nasional, liu liu hatene oinsa define estratejia ruma atu bele sustenta sira nia organizasaun tenke kontinua sustentavel para bele ajuda operasional ba programa sira neebe halo.
Nunee mos Diretor Ezekutivu husi Commns, Universidade of Wisconsin Madison Mary Beth Collins afirma, atividade nee importante los hodi halo parseria ho Embaixada Estadu Unidos Amerika ho lideransa Diretora Diana nia ajuda tebes ba partsipante sira nomos Universidade of Wisconsin Madison.
“Hau mai iha Timor iha 2023, iha programa interkambiu ida hodi haree direita esperensia saida mak iha TL, liu liu iha parte sosiedade sivil nian. Momentu neeba hau iha Dili no Ermera, hau sente empresiona los mudansa enerjia sira nee mak sosiedade sivil halo iha TL,” katak nia.
Nia hatete, sosiedade sivil iha Timor Leste mos kontribui makaas iha prosesu independensia no prosesu dezenvolvimentu nasional.
(eme)
