DILI, STLTIMORLESTE.com – Foos ho marka Japonica Rice “TAKESHI” laiha kualidade ba konsumidores sira iha Timor Leste (TL), tanba foos refere laiha nutrisaun no namlaek lalais deit.
“Ita konsidera foos ho marka Japonica Rice nee laiha kualidade no nutritivu ba konsumidores sira, no folin mos sae iha supermerkadu sira. Saku 20kg ida ho folin US$ 16, 25 kg sae ba US$ 18, maibe foos nee rasik laiha nutrisaun diak. Bainhira tein no tasak mak seidauk haan ba horas haat ba leten, nia sei sai naben no namlaek,” dehan Konsumidor Junilda Soares ba STL iha Merkadu Manleuna, Tersa (26/11/2024).
Tuir konsumidor nee katak, foos nee kualidade la hanesan ho foos sira seluk, tanba foos seluk tein no rai too oras haat lima mos sei maran nafatin, mezmu folin la normal, maibe foos Japonica Rice nee tein mak rai kleur oituan no la haan mak sei namlaek. Maibe folin kontinua la normal iha merkadu nasional sira, signifika produtu importasaun ida nee laiha nutrisaun ba konsumidores.
Iha fatin hanesan, Vendedor ba Foos iha Merkadu Manleuna, Anastacio Baptista afirma, foos neebe lori mai faan iha loja merkadu nasional, ba sosa tutan fali iha kompanhia sira, hafoin mai faan, tanba nee foos sira neebe iha kualidade no lae, nee kompanhia mak hatene.
“Ami labele detekta no identifika katak foos nee iha kualidade ka lae! Foos folin mos tun ou sae, tanba kuandu faan, folin tun depende kompanhia faan, tanba foos neebe lori mai ona iha kompanhia, signifika detekta ona katak, produtu foos importasaun nee iha nutrisaun no kualidade, nunee ami hanesan vendedor sira ba sosa tutan hodi mai faan fali ba konsumidores sira,” nia realsa.
Tanba nee foos sira neebe laiha kualidade no nutrisaun diak ba komunidade iha publiku, husu ba Governu atu halo deteksaun diak, nunee hanesan vendedores bele sosa mai faan tutan fali ba komunidade sira iha area rural no remotas sira atu konsumu hodi aumenta sira nia saude saudavel, no folin neebe karun tuir kualidade foos neebe iha.
(EST 1)
