METINARO, STLTIMORLESTE.com – Membru FALINTIL-Forsa Defeza Timor Leste (F-FDTL) nain 10 neebe tuir kursu lian português termina ona segundu kursu Intensivu Lian Português nivél A1/A2 no nível B1/ nivél B2 sei iha faze esperimentál, neebe halao iha Sentru Instrusaun Komandante Nicolau Lobato Metinaro, Dili.
Nia agradese bá excelência sira neebe tuir ona serimónia enseramentu ida neebe ba Kursu Intensivu daruak iha Lian Português ba Fins Espesífiku nian.
“Hau atu dehan katak, kursu intensivu daruak ba Lian Português Fins Espesífiku durante tinan 1, ninia objetivu prinsipál mak atu forma pesoal Militár Timoroan sira nuudar formador ba Lian Português Fins Espesífiku sira, atu nunee F-FDTL bele iha Militár Timoroan neebe kualifikadu hodi hanorin Lian Português iha Komponente, Unidade no Órgaun oin-oin,” hatete Komandante Forsa Apoiu Geral, Tenente Koronel João Bosco Ximenes “LENOK” ba jornalista sira liu husi nia diskursu iha Metinaro, Kuarta (09/07/2025).
Nia tenik, lian Português importante ba TL nuudar meiu indispensavel no distintivu atu afirma nasaun nee iha kontestu Jeopolítiku Sudeste Aziátiku nian, no esensial atu alkansa ninia objetivu polítiku no estratejiku sira iha rejiaun ida nee iha mundu,” Tenik Komandante FAG.
Iha fatin hanesan, Diretór Tekniku Projetu-2, Tenente Koronel Infantaria, Bruno Miguel Clara Fernandes Gaspar Mendes informa, onra boot ba ita hotu iha konvidadu ba enserramentu simbóliku ida nee ba 2º Kursu Intensivu Lian Portugués bá Fins Espesifiku (CIPFE).
Nia deklara, formasaun nee kontribui diretamente ba dezenvolvimentu profisional no dezenvolvimentu soldadu F-FDTL sira, iha sira nia Komando ba lian portugués oinsa atu forma soldadu Timoroan sira, nuudar futuru formador lian Português nian ba Fins espesífiku sira, hodi fo dalan ba sira atu hanorin. Ida nee nuudar hakat krusial ba autonomia no sustentabilidade hanorin lian Portugués iha Instituisaun F-FDTL nia laran.
Nia hatutan, kursu ida nee loos duni hanesan valór akresentadu ida ba futuru instituisaun nian. Tanba liu husi formador Timoroan foun sira nee sei bele alkansa kualidade boot liu tan iha preparasaun dokumentasaun ofisiál nian, hadia komunikasaun portugués tantu internalmente ho Asesor sira hodi fasilita dezempeñu misaun no funsaun sira iha futuru.
“Ba profesor lian português, obrigadu ba imi nia kompromisu no dedikasaun. Hau hatene katak viajen ida nee ezije tebes ba ita boot mos, prosesu ida neebe kontínua ba aprendizajen, adaptasaun. Maibe hau iha serteza katak, bainhira ita boot haree fali ba viajen, ita boot sente hanesan hau, katak ida nee hotu vale duni,” nia koalia.
Nia afirma, kursu Intensivu daruak ba lian Portugés Fins Espesifiku ba formadus nain 10 mai husi Kuartel Jeneral, Komponente Naval, Unidade Polisia Militar, Unidade FALINTIL inklui Sentru Formasaun Komandante Nicolau Lobato durante tinan 1, hahu loron 1/08/2024 no termina iha loron 9/08/ 2025.
(jen)
