DILI, STLTIMORLESTE.com – Ministeriu Justisa hahu reuniaun Konselhu Pedagojika hodi haree kona-ba kandidatu majistradu nain 24 neebe fila ona husi Portugal mai Timor, hodi koloka ba faze pratika iha instituisaun relevante hanesan Tribunal, Prokurador Jeral no mos Defensor Publiku.
Tuir Ministru Justisa Sérgio da Costa Hornai katak, sira nain 24 mak ba halao faze pratika iha Portugal, konforme politika iha IX Governu Konstitusional ninian, liu-liu halo implementasaun dekteru lei 28/2024 ninian oinsa mak atu lori formandu sira hodi bele halo formasaun iha sentru estadu judisiariu Portugal ninian.
“Sira fila ona mai iha Timor ami iha reuniaun Konselhu Pedagojika iha semana sira liu ba kotuk hodi koalia kona-ba formandu sira nee nia reitegrasaun ba iha faze tuir mai,” dehan Ministru Justisa Sérgio da Costa Hornai bá jornalista sira iha Kaikoli, Tersa (08/07/2025).
Nia hatutan, formandu majistradu nain 24 nee sei koloka ba instituisaun relevante, liu-liu iha Defensor Publiku nain 4 neebe hola parte iha formasaun nee, ho Prokurador ba futuru kandidatu nain 7 no mos Juiz hamutuk nain 13.
Sublina, prosesu nee lao hela, maibe sei hein sentru formasaun juridiku judisiariu sei aprezenta relatoriu ida ke detalhu, no mos ho ninia akomulasaun ba iha klasfikasaun sira durante iha periodu pratika ninian.
MJ reforsa, prosesu pratika ba majistradu foun komforme dekteru lei katak, bele iha tinan ida masimu, formasaun teorika iha fulan 18, faze pratika fulan 6.
Maibe MJ dehan, foin daudaun ho lei neebe mak iha prolonga tan ba fulan 6 hamutuk fulan 12, depois tama iha faze estajiu ninia, majistradu nain 24 sei hamutuk iha instituisaun relevante sira hanesan Tribunal, Prokurador, Defensor Publiku iha faze pratika durante fulan 12.
Governante akresenta, prosesu nee kuaze han tempu too tinan 4, sira sei halao sira nia atividade iha instituisaun relevante sira. No formasaun nee remata, sei iha koordenador, kada formandor idak-idak neebe halo formasaun ba iha akompanhamentu hodi aprezenta ba Konselhu Pedagojika iha sentru formasaun juridiku judisiariu.
Nunee mak aprezenta ba Ministeriu Justisa no hatoo ba instituisaun relevante hanesan Prokurador Jeral Republika no mos Prezidente Tribunal Rekursu inklui Defensor Publiku Jeral para atu haree kona-ba kandidatu sira nee aktidaun ba iha periodu formasaun iha faze pratika no mos faze estajiu ninia.
Iha fatin ketak, Jurista Jose Maria Guterres dehan, ho rekursu umanus neebe iha bele kompleta rekejitus sira atu pasa hodi apoiu servisu Tribunal nian lao ba oin.
“Ita haree kazu pendente mos bele kauza mai husi numeru la sufisiente, tanba nee ho rekursu sira neebe iha sira bele pasa iha prosesu nee, hodi apoiu servisu Tribunal nian,” dehan nia.
Afirma tan, rekursu umanus barak bele redus numeru kazu pendente, atu labele mosu beibeik preokupasaun iha sosiedade sira nia leet.
(ter)
