DILI, STLTIMORLESTE.com – Organizasaun Naun Governamental Asian Justice And Right (AJAR) distribui sertifikadu ba formandu nain 60 resin ba klase tolu (3), iha klase joven direitus umanus, defensor diretus umanus no joven ba dame.
Organizasaun Naun Governamental HAK/Asian Justice And Right (AJAR) realiza dialogu hodi hanoin hamutuk kona-ba kondisaun relasiona ho assuntu edukasaun, saúde, agrikultura no bee moos, hodi selebra loron direitu umanus no distribui sertifikadu ba formandu sira.
Distribuisaun nee realiza iha salaun UCT Balide, Dili, Tersa nee (10/12/2024).
Diretor Ezekutivu AJAR, José Luis Oliveira hateten, formandu hamutuk nain 60 resin no nain 5 neebe ohin simu sertifikadu nee valor diak, no sira neebe valor diak liu mak nain 2 hato’o diskursu.
“Ami la disponivel atu fahe hotu sertifikadu, maibé sira seluk orsida lokraik mak ami sei fahe sertifikadu ba sira no agora sira sei tuir lai atividade sira nee,” tenik Diretor Ezekutivu AJAR, José Luis Oliveira.
Fahe sertifikadu ba joven diretus umanus nee programa husi AJAR neebe mak fahe ba klase tolu, klase primeiru mak klase ida joven direitus umanus, hahu aula iha fulan Fevreiru remata iha fulan Dezembru, segundu mak klase joven ba dame, hahu aula iha Maiu remata iha Dezembru no terseiru klase mak defensor direitu umanus.
Ohin loron okaziaun Direitu Umanus ami ensera eskola hirak nee ba tinan nee, AJAR iha programa ida kona-ba eskola Direitu Umanus Justisa Sosial, ami habadak tau naran ativista ho intensaun prepara joven sira sai lideransa ba futuru aban bainrua neebe diak.
Iha klase Defensor Direitu Umanus hamutuk ema nain 25, sira neebe remata hamutuk nain 20 deit, klase baze sira aprende iha loron Sabadu, klase joven ba dame ema hamutuk 35 husi universitariu sira, maibé to’o remata ema hamutuk nain 29 no klase Direitu Umanus hamutuk 20 resin, maibé remata sira hamutuk ema nain 60 resin.
Planu ba oin kontinua halo, tanba ida nee planu AJAR nian, nafatin loke inskrisaun, prepara joven sira sai futuru lideransa neebe mak diak, tenke umanista, no programa ida nee loke ba joven universitariu sira, kriteria semester III ba leten.
(EST 3)
