DILI, STLTIMORLESTE.com – Jurista Jose Maria Guterres hatete, autor judusial formasaun iha rai liur importante, tanba liu husi formasaun bele troka hanoin ba malu.
“Formasaun iha rai liur importante duni, tanba liu husi formasaun neebe iha bele troka hanoin ba malu, kompleta malu atu saida mak ita aprende iha formasaun, bele mai pratika iha servisu sira,” dehan Jurista Jose Maria Guterres ba STL iha Tribunal Dili, Sesta (07/02/2025).
Nia hatutan, lei barak mai ho lian portugues, tanba nee, se formasaun iha Portugal bele aumenta diak liu tan formadus sira nia konhesimentu atu fila mai halao knaar ho diak tuir lei haruka, liu-liu oinsa hanesan autores judisial halao knaar tuir saida mak lei hateten ona.
Iha fatin ketak, Ministru Justisa, Sergio Hornai dehan, formasaun iha faze tolu, iha faze teorika, faze pratika no mos estajiu, depois mak sira foin halo integrasaun hanesan Juiz kareira ka Juiz permanente, maibe hakarak melhora tan sira nia konhesimentu ba iha teorika, pratika iha lingua no mos direitu nee rasik.
“Fo ba sira halo izolamentu fulan 6 nia laran atu pratika deit ho sidadaun sira iha Portugal, no formasaun neebe sira halo ho formador sira atu hasae tan sira nia konhesimentu ba iha teoria pratika neebe iha atu hasae tan sira nia konhesimentu,” dehan governante nee.
Nia dehan, tuir lo-loos formasaun durante tinan 1, maibe ho sirkunstansia balu sei haree fali, atu iha futuru sei lao diak tan.
(ter)
