DILI, STLTIMORLESTE.com – Tribunal Judisial Primera Instansia Dili halao julgamentu ba arguidu nain tolu ho inisial NJPS, MG no JXS, tanba fornese sasan ba iha Ministeriu Interior la tuir kontratu neebe iha.
Tuir akuzasaun neebe Juiz Fransisca Cabral lee sai iha loron Kuarta (11/12/2024) katak, Servisu Imigrasaun importante tebes atu kontrola movimentasaun ema no sasan sira sai no tama iha teritoriu Timor, atu kontrola movimentasuan ida nee presiza ema no ekipamentus espesifiku iha parte eletroniku nian hodi fasilita servisu sira nee.
Haree ekipamentu sira nee barak ladun funsiona, entaun pesoal IT hatoo proposta ba Diretor Jeral Imigrasaun atu kompra ekipamentu eletroniku atu bele utiliza fasilita servisu iha Unidade Servisu Imigrasaun nian iha Ministeriu Interior.
Proposta atu kompra mak makina impresaun ho marka DELLETE ho ekipamentu eletroniku sira seluk enkamina ba Diresaun Aprovezionamentu MI nian atu halo tenderizasaun.
Diresaun Aprovezionamentu halo anunsiu publika iha Jornal ida, no MI prevEe orsamentu montante US$ 650,000,00 atu kompra ekipamentu eletroniku sira nee, maka servisu imigrasaun presija no atu utiliza hodi halao servisu.
Momentu neeba kompanhia lubuk ida mak konkore iha konkursu nee, inklui kompanhia R2M IT Solution Unip, Lda, no ikus mai kompanhia refere mak sai vensedor asina kontratu ho MI atu fornese makina impresaun ho marka DILLETA.
Iha loron 23 fulan Setembru tinan 2020, kompanhia entrega ekipamentus empresor sira ba MI no ekipa IT husi Servisu Imigrasaun halo inspesaun no teste ba sasan sira nee no detekta katak, impresora nee laos marka DILLETA, maibe makina marka EPSON mak taka fali stiker DILLETA hodi haree ba hanesan makina empresora DILLETA.
Parte finansa halo tiha ona prosesu pagamentu ba Kompanhia refere tinan 2019 ho montante osan total US$ 648,555.00. Pagamentu ida nee pakote ekipamentu eletronika ba material neebe antes nee halo tiha ona kontratu ho kompanhia refere inklui makina emprespra DILLETA.
Pagamentu kada impressora ho marka DILLETA ho nia kustu US$ 3,500.00 no tuir pedidu husi MI ba Kompanhia refere atu fornese makina impesora hamutuk 22 ho nia folin hamutuk US$ 77,000.00.
Osan neebe selu tiha ona ba Kompanhia refere ho montante US$ 648,555.00, kompanhia devolve fali ona ba kofre Estadu liu husi konta bankaria MI.
Atetude husi kompanhia, Estadu RDTL liu-liu Servisu Imigrasaun hetan prezuiju hanesan sistema impresaun ba vistu sira ba sidadaun estranjeiru sira labele funsiona ho diak, no mos la konsege imprime karta autorizasaun ba rezidensia tanba nia papeis la iha kualidade.
Nain ba Kompanhia refere mak arguidu NJPS, MG, JMS, no kompanhia refere Diretor mak arguidu NJPS.
Tanba nee, Ministeriu Publiku akuza arguidu nain tolu hanesan ko-autor material ba krime falsifikasaun dokumentus ka notasaun teknika no falsifikasaun agravadu neebe previstu iha artigu 303 no 304 husi Kodigu Penal.
Lee tiha akuzasaun nee, Juiz prosesu haree katak, defeza husi arguidu nain rua nian la marka prejenza, tanba nee Tribunal desidi adia ba loron seluk hodi rona deklarasaun husi arguidu nain tolu.
Audensia julgamentu nee prezidi husi Juiz Koletivu, Afonso Carmona, Fransisca Cabral, Jose Escurial, Ministeriu Publiku reprezenta husi Prokurador Matias Soares, arguidu hetan asistensia legal husi Advogadu Privadu.
(ter)
