DILI, STLTIMORLESTE.com – Autoridade Forsa Konjunta Polisia Nasional Timor Leste (PNTL) ho FALINTIL-Forsa Defeza Timor Leste (F-FDTL), junta ho Seksaun Tranzitu Seguransa Rodaviariu Munisipiu Ermera implementa diretiva operasaun konjunta halo cek poin ba sirkulasaun transporte tama no sai konsege asegura kareta ida tula bebidas sprite ho Coca-cola Kaixa 106 halo tranzasaun ilegal mai Territoriu Timor Leste.
Tuir nota komunikadu imprensa neebe STL asesu husi Media PNTL iha Kuarta nee (08/10/2025) sita katak, atividade operasaun konjunta pasa revista ba tranporte sira tama no sai iha area juridiku Munisipiu Ermera, halao iha loron (08/10) tuku 05:20 dader nee iha Suku Tokoluli, Postu Administrativo Railako, Munisipiu Ermera.
“Iha operasaun konjunta pasa revista nee indetifika kareta ho marka triton ho sapa matrikula B. 17-206 TLS deskonfia tula bebidas sprite ho Coca-cola Kaixa 106 neebe halo tranzaksaun ilegal iha fronteira Maliana tama husi Munisípiu Eremara atu viajen ba Dili,” haktuir nota komunikadu imprensa nee.
Hafoin ekipa deskobre hetan sasan bebidas sprite ho Coca-cola Kaixa sira nee iha kareta laran, maibe kondutor ho naran inisial BG no sasan nain ho naran inisial JdA la koopera halai, tanba forsa konjunta halo aprosimasaun sira nafatin halai ekipa deside tiru kuak kareta nia roda, hafoin halo apreensaun ba sasan hirak nee no kaptura kedas sasan nain ho motorista hodi kontinua submete ba prosesu invetigasaun.
Evidensia bebidas ho kareta hamutuk kondutor no nain ba sasan daudaun nee forsa konjunta entrega ona ba parte Seksaun Servisu Investigasaun Munisipiu Ermera hodi prosesu tuir dalan legal.
Iha operasaun nee lidera direta husi Komandante PNTL Munisipiu Ermera, Superintendente Polisia Ludgerio Picacio Madeira Lay hamutuk ho forsa konjunta PNTL ho F-FDTL destakdu iha Glenu Munisipiu Ermera.
Jornalista: Alberto Menezes
Editor: Xisto Mendonça
