DILI, STLTIMORLESTE.com – Ministeriu Interior (MI), Francisco da Costa Guterres hatete, wainhira aumenta diviza aumenta responsabilidade iha Instituisaun Polísia Nasional Timor Leste (PNTL) ba povu no ba nasaun ida nee.
“Wanhira ita simu diviza, aumenta diviza aumenta ita nia responsabilidade, ita nia responsabilidade atu servi povu no nasaun ida nee,” hatete Ministru Interior (MI), Francisco da Costa Guterres ba jornalista STL iha fatin UPM, Tersa (27/05/2025).
Nia tenik, dezeju ba membru PNTL hotu no tenke servisu ho rigor, servisu ho disiplina nomos servisu kaer metin prinsipiu jerais neebe mak regulariza ona iha estatutu nomos regula ona iha regulamentu disiplinar no lei Organika PNTL nian.
“Ita boot sira sempre iha regulamentu neebe mak regulamenta ita boot sira, tanba nee tane aas nafatin prinsipiu sira nee, no tane aas nafatin disiplina, tane aas nafatin kapasidade, atu nunee ita boot sira bele servi povu ho nasaun nee diak liu tan,” nia hatutan.
Iha fatin hanesan, Segundo Komandante Jeral Polisia Nasional Timor Leste (PNTL), Komisáriu Jerál Polisia Pedro Belo apela ba Komando Munisípiu Dili atu aumenta tan frekuensia Membru PNTL sira atu halo patrulhamentu hodi halo seguru seguransa iha sidade Dili.
Komisariu Pedro Belo hatoo apela nee hafoin tula promosaun deviza tranzitoriu no por-antiguidade ba membru Komando PNTL Munisipiu Díli, hamutuk nain 409.
“Razaun neebe hau apela atu Membru PNTL sira aumenta frekuensia patrulhamentu, tanba konsidera Dili sai hanesan kapital nasaun nian no nuudar sentru ba Administrasaun Governu nian no orgaun haat nee, nomos instituisaun estadu sira,” nia deklara.
Nia informa, kapital Dili mos sai sentru atividade polítika no atividade sira seluk tan. Nunee kresimentu populasaun iha Dili barak no nivel atividade hotu-hotu konsentra iha Dili.
“Iha sidade Dili nakonu dezafiu ameasa ho krime no violensia oin-oin, hanesan krimi ofensa integridade fizika simples, maustratu konjuze, violensia domestika, danu agravadu simples, kontra bandu, abuzu sexual ba minoridade no seluk tan,” nia esplika.
Nia deklara, ho nunee Membru PNTL Komando Munisípiu Dili tenke marka prezente ho profisional, umanizmu no firmi nafatin hodi garante seguransa sidadaun hotu-hotu iha kapital Dili.
“Atu halo seguru Dili mak tenke aumenta frekuensia patrulhamentu, no prezensa Polisia iha terenu, no hametin koordenasaun ho F-FDTL, no servisu hamutuk ho governu lokal sira optimizasaun ba teknolojia, no halakon krimi kobra ilegal no gen motorista sira, krimi organizadu no bandidu sira neebe perturba komunidade,” nia informa.
Nia mos husu Membru PNTL tenke firme hodi maneza manifestasaun sira, ho mantein koordenasaun ho komunidade, autoridade lokal sira no media sira no elementu hotu-hotu.
“Tan nee, mai ita hotu-hotu servisu hamutuk atu mantein sidade Dili seguru no hakmatek. Ita hotu fiar katak ho ita nía kompromisu no lealidade bele kompleta knaar boot sira nee ho diak,” nia deklara.
Nia koalia, promosaun deviza nee sai hanesan ponte motivasaun no inspirasaun ida atu hametin etika servisu nomos enkoraja atu hadia dezempenhu servisu, dedikasaun hodi sai hanesan elementu importante bá dezenvolvimentu PNTL.
“Ita husu atu membru idak-idak hadia diak liu tan servisu, tanba knaar no dever neebe mak atribui ba Komando Munisípiu Dili atu mantein seguransa no ordem publika, hodi aplika lei no atendimentu bá komunidade munisípiu Dili,” katak nia.
Nia argumenta, ba Membru PNTL sira ba oin hatudu responslidade durante halo funsaun kontinua hatudu leyalidade, respeita irarkia, hatudu disipliña ba Komandante sira hodi servi institusaun PNTL ho diak liu tan.
“Husu ba imi aumenta deviza aumenta responsablidade, tanba ne’e tenke hatudu profisionalidade, respeita ba irarkia Komando,” nia afirma.
(jen)
