DILI, STLTIMORLESTE.com – Deputadu husi Bankada FRETILIN, Jose da Cruz lamenta ho Xefe Suku Kolimau neebe koa osan terseira idade nia osan ho montante US$ 30.
“Komunidade Suku Kolimau sira lamenta tebes ho Xefe Suku Kolimau nian neebe mak foin daudaun ferik katuas sira simu sira nia osan, Xefe Suku nee koa tiha ferik katuas sira nia osan US$ 30, la hatene tanba saida mak sira koa ferik katuas sira nia osan sem justifikasaun husi sira,” katak Deputadu Bankada FRETILIN, Jose da Cruz iha plenaria (PN), Segunda nee (07/04/2025).
Deputadu nee dehan, US$ 30 nee inan aman sira nia osan nee konstituisaun garante, iha artigu 20 neebe mak ferik katuas sira nee hetan halo tratamentu espesial iha vida ekonomia ninian, maibe sira simu infelizmente xefe suku sira kua fali.
“Hau hanoin ida nee ita koalia kona-ba administrasaun hodi hakbesik ba povu, maibe pratika sira nee kontinua iha, hanoin ida nee laos atu ajuda povu maibe nee atu halo povu susar no terus nafatin,” nia akresenta.
Nia afirma, komunidade sira mos husu atu aprezenta iha Parlamentu Nasional para nunee Komisaun Anti Korrupsaun (KAK) ho Provedoria Diretu Humanu no Justisa (PDHJ) tenke halo investigasaun ba xefe suku nee.
“Hau hanoin Ministru bele foti nota didiak hodi bele aprezenta ba iha PDHJ no KAK, para halo investigasaun imediata hodi bele hapara hahalok sira nee iha povu sira nia leet,” katak Deputadu Jose.
Hatan ba kestaun nee, Visi Ministru Asun Parlamentar, Aderito Hugo hatutan, ida nee tenke konfirma, tanba nee akontese iha suku ida iha Bobonaro mak halo ida nee, espera katak informasaun ida nee loos, maibe hau sei envia ba MAE para bele halo Cross check ba informasaun nee.
“Se akontese duni koa US$30 hanesan deputadu koalia ne’e, lamenta tebes, maibe tenke haree took razaun saida mak xefe suku sira bele koa, tanba xefe suku sira mos hetan fiskalizasaun husi konselhu suku Prezidente Autoridade Munispiu no Administrador Postu nee mos akompanha halo supervizaaun ba sira nia dezempenhu sira para la bele koa,” dehan Aderito.
(EST 2)
