DILI, STLTIMORLESTE.com – Bankada FRETILIN iha Parlamentu Nasional (PN) husu IX Governu Konstitusional atu solusiona fronteira Naktuka tuir tratadu neebe asina husi Olanda ho Portugal iha tinan 1904.
Liu husi deklarasaun politika FRETILIN, Deputada Lidia Norberta defende katak, lalaok definisaun fronteiras Timor Leste nian hahu estabelese liu husi Tratado de demarcação neebe asina husi Portugal no Olanda iha Lisboa, 20 de Abril 1859, no ratifika iha 23 Agostu 1860.
Tuir nia, konvensaun demarkasaun possessoes Portugal no Olanda iha Timor, neebe asinadu iha Haia iha loron 1 Outubru 1904 ho ratifikasaun iha 29 Outubru 1908 haktuir Artigu I no II husi Konvensaun, atu regula kondisaun favoravel liu ba dezenvolvimentu sivilizasaun no komersiu iha pose arkipelagu Solor no Timor.
“Bankada FRETILIN hakarak husu ba governu atu solusiona problema Naktuka no defini linha fronteira terrestre ho lo-loos tuir tratadu Portugal ho Olandia iha tinan 1904,” hatete Deputada Lidia Norberta liu husi deklarasaun polítika, iha plenaria PN, Segunda (10/03/2025).
Nia hatutan, Governu Timor Leste tenke bazeia ba akordu tinan 1904, wainhira Governu Indonezia la aseita mak tenke keixa ba tribunal internasional hodi buka lia loos.
“Se Indonezia lakohi tuir ita bele rekorre ba tribunal internasional, tanba kestaun ida soberania la haree ba nasaun kiik ka boot, riku ka kiak, maibe sei define tuir lei nasional no prinsipiu direitu internasional sira,” hatete Deputada nee.
(alb)
