DILI, STLTIMORLESTE.com – Bankada FRETILIN iha uma fukun Parlamentu Nasional (PN) husu ba Ministeriu Saude (MS) atu foti medida rigorozu hasoru kompanhia balu neebe deskonfia fornese ai-haan dodok ba pasiente sira iha Hospital Nasional Guido Valadares (HNGV).
Tuir Deputada Nurima Ribeiro Alkatiri katak, iha fulan hirak liu ba nia kestiona no husu Ministeriu Saude atu tau atensaun ba ai-haan neebe mak kompanhia sira fornese ba pasiente sira iha hospital, tanba ai-haan neebe iha la prienxe rekejitus.
“Hau rasik ba vizita pasiente balu haree katak, hahan neebe fornese ba pasiente sira nee la prienxe rekejitu nutritivu ba pasiente sira,” hatete Deputada Nurima iha resintu PN, Segunda (16/12/2024).
Nia hatutan, fornese ai-haan ba pasiente sira laos haree ba hahan importadu ka hahan lokal, maibe nia problema mak kuandu atu fornese hahan ba pasiente sira, depende ba pasiente idak-idak nia moras mak prepara hahan, maibe ida nee durante nee la akontese iha hospital.
Tanba nee nia dehan, wainhira komisaun halo fiskalizasaun iha HNGV, levanta ida nee ho diresaun hospital nian maibe responsavel ba alimentasaun nutrisaun iha hospital momentu neeba mos hanesan defensivu los lakohi simu rekomendasaun sira nee. Bainhira AIFAESA identifika ona mak husu HNGV atu tau atensaun seriu ba problema nee.
Iha fatin hanesan, Prezidente Komisaun F neebe trata Asuntu Saude Seguransa Sosial no Igualidade Jeneru, Deputada Maria Bareto hatete, Komisaun F seidauk haree direita ba kompanhia neebe mak fornese ai-haan ba HNGV.
Maibe AIFAESA halo ona inspesaun ba ai-haan neebe kompanhia fornese ba pasiente sira iha HNGV no wainhira identifika mosu irregularidade mak Ministeriu Saude tenki foti medida rigorozu hasoru kompanhia nee.
“Se ida nee mak akontese duni irregularidade, hau rekomenda ba governu liu husi Ministeriu Saude atu toma atensaun ba ida nee, se kompanhia la merese entaun bele haree fila fali, tanba fim do ano ona inisiu tinan 2025 hodi haree fila fali kompanhia foun neebe mak bele fornese hahan kualidade liu no tuir nesesidade pasiente sira nian iha hospital,” dehan Deputada Maria Bareto
(alb)
