DILI, STLTIMORLESTE.com – Deputada husi Bankada FRETILIN, Angelica Rangel husu Primeiru Ministru (PM) Kay Rala Xanana Gusmão kuidadu povu, labele baku no duni bainhira buka hahan iha estrada.
Kestaun née Deputada Bankada FRETILIN, Maria Angelica Rangel, sita fila fali PM Xanana nia mensajen horiseik dehan, hanesan Sua Santidade Papa Francisco vizita foin daudaun nee, vizita ida neebe ema fiar no sei moris nafatin iha memória, buat neebe Timor Leste iha, diak liu no murak liu mak nia povu.
“Tanba nee PM tenke kuidadu povu Timor, hanesan uluk povu kuidadu ita boot iha tempu difisil nia laran, labele baku povu, hanesan ita haree iha televizaun duni povu tun sae, hanesan Sekretariu Estadu Toponomia Organizasaun Urbana (SEATOU) halo”, katak Deputadu FRETILIN, Maria Angelica Rangel iha debate proposta OJE 2025 iha PN, Kinta nee (07/11/2024).
Tuir nia, povu tanis tuir dalan, tanba buka hahan bikan ida, maibe duni povu tun sae.
Entretantu Primeiru Ministru (PM) Kay Rala Xanana Gusmão iha abertura debate proposta OJE 2025 hatete, “Sua Santidade Papa Francisco, iha vizita foin daudaun mai TL, ita hotu fiar sei moris nafatin iha hotu-hotu nia memória. Buat neebe diak liu no murak liu mak nia povu”, hatete PM.
(gui)
