DILI, STLTIMORLESTE.com – Bankada FRETILIN iha Parlamentu Nasional (PN) konsidera durante mandatu IX Governu Konstitusional halo violasaun direitu umanu grave hasoru populasaun sira, tanba hasai obrigatoriu populasaun sira inklui asesu ba saude.
Kestaun nee Deputada Bankada FRETILIN, Lidia Norberta deklara relasiona ho komemorasaun loron internasional ba Direitu Umanu ba dala 76, neebe realiza iha loron 10 Dezembru 2024 nee.
“Ita haree pratika violasaun direitu umanu iha Governasaun agora nee iha violasaun rua ba povu nia moris, ida mak violasaun ba abitasaun no seluk mak violasaun direitu populasaun nian atu asesu ba saude,” hatete Deputada Lidia Norberta iha sala Bankada FRETILIN, Tersa (10/12/2024).
Tanba tuir nia, iha Konstituisaun RDTL hatete katak, iha setor saude nee estadu iha dever atu garante saude ba ema hotu ho gratuitu, no garante mos hela fatin ba sidadaun sira la haree ba nia nee se.
“SEATOU hakarak halo politika eviksaun nee tenki iha duni desizaun ida husi tribunal, tribunal hasai desizaun bazeia ba dokumentu legal hodi hatudu ba populasaun sira muda husi fatin neebe populasaun sira okupa nee. Maibe pratika neebe akontese iha ita nia rain, ita ignora tiha politika planeamentu urbanu no ita ignora tiha kompetensia justisa nian, tuir los tenki hein desizaun tribunal, depois mak implementa, entaun too ikus sasan sira nee kahur, tanba nee ohin ita haree loron direitus umanus nee violasaun rua nee boot tebes iha Timor,” hatete Deputada nee.
(alb)
