DILI, STLTIMORLESTE.com – Parlamentu Nasional (PN) liu husi Bankada FRETILIN kondena makaas asaun Sekretariu Estadu Asuntu Toponomia no Organizasaun Urbana (SEATOU), neebe hasai obrigatoriu populasaun sira neebe hela besik mota ninin iha Fomentu II, maibe la kria kondisaun ruma ba sira.
Deputadu Bankada FRETILIN, Jose da Cruz hatete, pasajen tinan 2024 ba 2025 lo-loos nee lori ksolok ba ema hotu, maibe ema balu simu tinan foun ho matan-been, tanba tenke lakon sira nia hela fatin neebe sira harii ho sira nia kosar-been rasik iha Dili laran, liu-liu sira neebe hela iha Fomentu II, Komoro.
Tanba nee Bankada FRETILIN hotoo solidariedade no empatia ba eviksaun forsada neebe halao husi Governu ba sira nia hela fatin.
“FRETILIN lamenta no kondena tebes atuasaun Governu nian hodi halo eviksaun ho forsa ba populasaun iha Fomentu II la ho kondisaun ruma, tanba husik deit afetadu sira iha neeba, hafoin sobu hotu sira nia uma, sira rasik la hatene atu ba neebe,” hatete Deputadu, Jose da Cruz liu husi deklarasaun politika Bankada FRETILIN nian iha plenaria, PN, Dili, Tersa (07/01/2025).
Nia hatutan, evikasaun neebe mak SEATOU halo hasoru populasaun sira iha Fomentu II nee hanesan hahalok sira neebe uluk povu ida nee esprimenta ona iha ukun sira ditadura nian. No ohin loron esprimenta fali iha rai ida livre, independente no demokratiku.
Tanba povu ida nee luta no konkista vitoria ba Independensia ida nee tanba hakarak harii estadu ida neebe bele proteje no respeita sira nia direitu atu moris, no asegura futuru ida neebe nabilan ba sira, ba sira nia oan no beioan sira nia moris.
Maibe eviksaun neebe SEATOU halo nee la respeitu direitu umanu povu nian, tanba nee nia husu ba Provedoria Direitus Umanus no Justisa nomos Ministeriu Publiku atu halo investigasaun.
(alb)
