DILI, STLTIMORLESTE.com – Bankada FRETILIN kondena makaas membru polisia sira, tanba halo agresaun fiziku hasoru sidadaun ida foin lalais nee, iha Munisipiu Vikeke.
Lamentasaun nee Deputadu Bankada Partidu FRETILIN, Dario Madeira levanta liu husi plenaria PN, Segunda (10/02/2025).
“Hanesan deputadu, hau kondena tebes-tebes ba atuasaun membru PNTL hasoru sidadaun ida iha Munisipiu Vikeke,” hatete Deputadu Dario Madeira.
Nia hatutan, joven neebe membru polisia sira baku nee ho kondisaun moras mental, no nia hanesan funsionariu publiku ida neebe oras nee halo hela servisu iha Ministeriu Agrikultura, iha area manutensaun ba traktor.
Nia konta katak, altura neeba antes membru polisia baku, sidadaun nee atu ba servisu fatin maibe mosu fali iha edifisiu PNTL Munisipiu Vikeke, nia koalia ba membru polisia sira katak servisu hanesan nee diak liu sunu tiha deit.
“Tanba nee, hafoin nia hasai liafuan nee nia uza motor halai tiha no polisia ho karreta duni tuir nia ba kaer nia baku nia, halo ita triste los, tanba nia monu tiha ba rai mos sira baku nafatin nee, hahalok hanesan nee hahalok milisia nian, nee laos polisia,” dehan nia.
Tanba nee Deputadu Dario Madeira husu Komando Jeral PNTL atu halo investigasaun ba membru polisia sira hodi lori ba tribunal, tanba baku sidadaun ida ho kondisaun moras mental.
“Polisia tenke kompri lei no orden,. asaun krimi bele akontese maibe polisia labele atua ho krimi, ida nee sala, ho nunee hau hakarak husu ba Komandante PNTL Munisipiu Vikeke no komando Jeral PNTL, Ministeriu Interior atu kolabora ho familia vitima hodi prosesu membru polisia sira neebe halo agresaun fiziku hasoru joven nee,” dehan nia.
(alb)
