DILI, STLTIMORLESTE.com – FRETILIN la autoriza Empreza Indonezia Exporta sasan ba Estadu Unidus Amerika (EUA) husi Dili, ho estegmentu nee Prezidente Republika Jose Ramos Horta hatete, FRETILIN lakohi entaun hakarak akordu ho Korea do Sul ka.
Prezidente Republika Jose Ramos Horta hatoo kestaun nee ba jornalista sira, bainhira remata akompanha jogu Voli Praia iha Lecidere, Tersa (22/07/2025).
Prezidente Republika hatete, se FRETILIN la konkorda halo akordu ho nasaun vizinhu sira entaun hakarak halo akordu ho Korea do Sul ka.
“Tanba sa mak la konkorda fali, halo akordu komersial, entaun FRETILIN hakarak halo akordu ho se? Korea do Norte ka, Indonezia ida ita vizinhu bele halo, tanba ita la exporta nee ita iha posibilidade ema seluk uza ita nia kouta fo empregu iha nee tulun ita ajuda ita manan tan esperiensia, se lei Amerika permite fo dalan ba ida nee indonezia hakarak halo hamutuk ho Governu Timor bele halo,” katak PR Horta.
Prezidente Republika hatete, buat nee halo barak ona, bainhira loke fabrika husi indonezia loke iha Timor emprega ema Timor rai ema Timor nia produtu balun Timor nee mak tama iha fabrika depois exporta ba iha Amerika ba Uniaun Europeia ka ba neebe deit.
“Hau hanoin FRETILIN la konkorda tanba se laiha informasaun sufisiente, tanba FRETILIN mos defende komersiu livre buat sira nee, hau hanoin tanba deit falta dialogu,” katak Horta.
Xefe Estadu hatete, Empreza Indonezia exporta sasan na Eua husi Dili nia impaktu negativu maibe impaktu pozitivu laiha,
foin lalais bankada opozisaun liu husi Partidu FRETILIN la aseita ho Ministru Komersiu Industria (MKI) Filipus Nino Pereira neebe deklara katak Timor Leste sei hetan benefisiu makaas wainhira Empreza Indonezia exporta sasan ba Estadu Unidus Amerika liu husi Timor Leste.
Aleinde nee Deputadu Oscar Lima hatete, atu exporta sasan sira ba rai liur nee kabe kompetensia governu liu husi Ministeriu Komersiu Industria oinsa atu halo servisu hodi exporta produtu ba rai liur.
Maibe tuir lo-loos governu prepara produtu iha rai laran atu exporta ba nasaun seluk, laos ba fali asina akordu ho empreza nasaun seluk atu utiliza Timor Leste hodi exporta sira nia produtu ba rai liur.
“Agora Ministru ba halo fali akordu ida ho empreza ida husi Indonezia nee mak hau nia pergunta, nusa ita la kria kondisaun no fasilidade para ita iha nee mak atu exporta ita nia sasan ba iha rai liur. Laos ita ba numpang fali husi ema nia empreza, ema mak hetan benefisiu kuandu sira halo sala ruma karik se mak naran aat karik, ita nia nasaun nia naran mak aat,” hatete Oscar Lima.
(eme)
