DILI, STLTIMORLESTE.com – Bankada Partidu Kongresu Nasional Rekonstrusaun Timorense (CNRT) deklara, Bankada Partidu FRETILIN no PLP iha direitu atu husu Tribunal Rekursu (TR) hodi halo fiskalizasaun ba lei organizasaun judisiaria.
Lia hirak nee Deputadu Bankada Partidu CNRT, Patrocinio Fernandes ba jornalista sira relasiona Bankada Partidu FRETILIN ho PLP neebe husu Tribunal Rekursu atu halo fiskalizasaun abstrata ba lei organizasaun judisiaria neebe Parlamentu Nasional aprova ona hodi autoriza Prezidente Republika (PR) nomeia Afonso Carmona nuudar Prezidente Tribunal Rekursu.
“Bankada opozisaun ezerse sira nia direitu ida, tanba Konstituisaun garante direitu ida nee bainhira haree katak iha diploma ruma ka inisiativa politika publika ba Parlamentu Nasional la simu tanba maioria aprova depois la simu bele husu ba tribunal atu halo fiskalizasaun abstratu, hanoin nee normal ezerse nia direitu,” hatete nia ba jornalista sira iha PN, Sesta (09/05/2025).
Nia dehan, Timor Leste adopta sistema demokrasia, Bankada FRETILIN ho PLP iha direitu husu Tribunal Rekursu atu halo fiskalizasaun wainhira sira haree desizaun neebe PR foti hodi nomeia Prezidente Tribunal Rekursu la tuir lei.
Molok nee Bankada FRETILIN No PLP hatama pedidu ba iha Tribunal Rekursu hodi husu Tribunal Rekursu halo fiskalizasaun abstrata ba segunda alterasaun lei Organizasaun Judisiariu, neebe fo kompetensia ba Prezidente Republika hodi nomeia Prezidente Tribunal Rekursu, Afonso Carmona.
“Ohin Bankada FRETILIN no Bankada PLP aprezenta pedidu ida ba Tribunal Rekursu, kona-ba lei numeru 04/2025 neebe foin lalais Parlamentu aprova Prezidente Republika promulga,” dehan Deputadu Joaquim dos Santos ba jornalista sira iha Kaikoli, Kinta (08/05/2025).
Nia hatutan, iha artigu 76 alinha A neebe iha artigu nee fo kompetensia ba PR atu nomeia PTR foun, konsidera norma nee viola konstituisaun, tanba nee mak husu ba iha Tribunal Rekursu halao nia knaar hanesan Supremu Tribunal atu julga norma nee, tanba tuir sira nia hanoin viola konstituisaun, no espera Tribunal sei julga tuir sira nia pedidu. No husu Tribunal atu halo fiskalizasaun abstrata.
(alb)
