DILI, STLTIMORLESTE.com – Prezidente Republika (PR), Jose Ramos Horta hatete, Partidu FRETILIN no PLP neebe vota kontra proposta sosa karreta ba deputadu sira, nee opiniaun neebe mak diak hodi halo sakrifisiu ba ekonomia Timor Leste.
Prezidente Republika Jose Ramos Horta hatoo lia hirak nee ba jornalista sira iha Konventu Madre Alma Bebenuk, Segunda (25/11/2025).
Nia hatete, partidu rua neebe mak vota kontra proposta sosa karreta ba deputadu sira, nee opiniaun neebe mak diak hodi hatudu sakrifisiu ba ekonomia TL nia.
“Sosa karreta ba deputadu sira, FRETILIN ho PLP vota kontra maibe bankada sira seluk hatete, sira presiza entaun se FRETILIN, PLP vota kontra lakohi ita agradese, nee signifika sira hakarak halo sakrifisiu ba ekonomia Timor nia, maibe sira seluk deputadu foun balun laiha transporte entaun sosa deit ba bankada Governu nian, tanba FRETILIN ho PLP vota kontra sira la presiza karreta nee diak, partidu boot osan iha nee uniku, nee mos laos problema boot ida,” katak PR Horta.
Iha biban nee, Prezidente Republika hatete, TL tama daudaun ona ba ASEAN, infraestrutura tenke aselera, tenke hadia eletrisidade, hadia telekomunikasaun no hadia estrada rural sira, tanba PM rasik promete ona.
Iha biban nee, Prezidente Parlamentu Nasional (PPN), Maria Fernanda Lay hatete, Parlamentu Nasional sei sosa karreta ba deputadu no deputada neebe hakarak no presiza deit, tanba kondisaun karreta aat ona hodi halo fiskalizasaun.
(eme)
