DILI, STLTIMORLESTE.com – Bankada Partidu FRETILIN preokupa ho bolsu estudu neebe mak atribui husi Ministeriu Ensinu Superior Siensia no Kultura (MESSK), tanba maioria jerasaun patriota labele asesu ba bolsu estudu nee.
Deputada Bankada Partidu FRETILIN, Maria Angelica Rangel hateten, Governu presiza fo bolsu estudu ba estudante sira neebe mak iha valor diak, tanba sira hanesan rekursu estadu nian.
Mezmu nunee, bolsu neebe atribui ba estudante Timor oan sira durante mandatu IX Governu Konstitusional, jerasaun patriota barak mak labele asesu ba bolsu estudu nee.
“Por ezemplu ita bele fo bolsu estudu ba sira liu-liu iha lei veteranu nee koalia kona-ba fo bolsa estudu ba ita nia veteranu nia oan sira, maibe na verdade ita nia veteranu nia oan barak mak la hetan bolsa iha ita nia metaden orsamentu neebe mak iha,” hatete Deputada Maria Angelica Rangel, wainhira deskuti orsamentu ba MESSK iha faze espesialidade liu husi Plenaria PN, Tersa (18/11/2025).
Nia hatutan, lakohi temi veteranu neebe mak nia oan la hetan estudu, maske tuir lei neebe iha jerasaun patriota sira nee iha obrigatoriu atu asesu ba bolsu estudu.
“Hau labele temi naran iha nee, maske iha lei hatete veteranu nia oan sira nee iha obrigatoriu bolsu hodi bele kontinua eskola. Tanba nee, ita dehan katak ita investe iha ita nia rekursu umanu nee hanesan sustentabilidade ba futuru nasaun nian, nee bele garantidu, tanba ita lakohi buat ida obskurantismu nee,” dehan nia.
Hatan ba kestaun nee, Ministru Ensinu superior Sieinsia no Kultura (MESSK), Jose Honorio katak, bolsu estudu neebe Governu liu husi MESSK no MAKLN loke nee fo oportunidade ba Timor oan hotu inklui vetaranu nia oan sira.
“Sim, atu hatete deit katak bolsu estudu husi MESSK nee nakloke ba Timor oan hotu-hotu, maibe mos iha mos ministeriu asuntu veteranu mos loke bolsu estudu ba veteranu nia oan sira,” hatan MESSK, Jose Onorio.
Nia dehan, bolsu estudu husi MESSK nee fo oprtunidade ba Timor oan, maibe aplika ho kriteria neebe mak rigorozu oituan, no estudante sira neebe iha valor diak sei asesu ba bolsu nee.
“Bolsu estudu neebe iha nee rigor oituan, sira neebe iha valor diak tenke ba, maibe ba hiran neebe valor la diak labele asesu ba bolsu estudu nee, no uluk hau rona deputadu balun koalia bolsu estudu nee fo deit ba familia deit, hau hanoin nee lalos, maibe ba Timor oan hotu,” dehan nia.
Timor oan sira neebe hetan bolsu estudu oras nee halao estudu iha nasaun sira mak hanesan Indonezia, Portugal, Brazil, Malazia, Kambodia no Tailandia.
Orsamentu husi Ministeriu ensinu Superior Siensia no Kultura (MESSK) hamutuk US$ 6.262.271, total husi orsamentu nee aloka ba salariu vensimentu US$ 3.141.797, bens no servisu US$ 1.390,474, tranferensia publika US$ 1.500.000, kapital menor rihun US$150.000 no kapital dezenvolvimentu US$ 80.000.
Iha votasaun ba Orsamentu Jeral Estadu (OJE) 2026 ba MESSK ho votu afavor 43, kontra 0 no abstensaun 21.
Jornalista: Alberto Menezes
Editor: Xisto Mendonça
