DILI, STLTIMORLESTE.com – Ema neebe fuan moos no laran moos mak ema neebe halo tuir Maromak nia hanorin no hakarak sira.
Padre Richardo Pasang SVD ba STL, Tersa nee (10/02/2026) hatete, devosaun ba loron Tersa koalia kona-ba devosaun loron-loron.
“Evanjelhu ohin nian (Markus 7:1-13) konvida ita atu reflete kona-ba fuan moos no obediensia ba Maromak nia ukun-fuan sira. Jesus kritika ema farizeu sira neebe fo prioridade ba ema nia tradisaun duke Maromak nia ukun-fuan, hodi hatudu katak fuan neebe loos mak ida neebe halo tuir Maromak nia hakarak,” dehan Padre.
Bibi Atan Kreda Katolika nee dehan, Santa Eskolastika, Saun Bento nia irman mak ezemplu ida moris nian neebe halo balansu entre orasaun no servisu. Nia hatudu katak forsa lo-loos iha relasaun íntima ho Maromak no preokupasaun ba ema seluk.
“Refleksaun Jesus kritika ema farizeu sira neglijensia Maromak nia ukun-fuan sira tan deit tradisaun. Oinsa hau fo prioridade ba Maromak nia ukun-fuan sira iha hau nia moris loron-loron? Santa Escolastica moris ho simplisidade no orasaun. Oinsa hau bele haburas, por ezemplu, moris ida neebe nakonu ho laran-sadia atu sai preokupadu liu tan ho ema seluk nia nesesidade sira? Hau husik buat neebe ladún importante hanetik hau atu hatudu domin ba Maromak no ema seluk? Mai ita aprende husi Santa Escolastica atu moris ho fuan moos, nakonu ho domin no laran metin ba Maromak,” dehan padre.
Padre dehan, ema idak-idak presiza halo tuir Maromak nia hakarak no hanorin sira, katak moris iha familia no sosiedade no nasaun presiza laran sadia, fuan moos, katak maske loron-loron preokupa ho servisu maibe keta haluha Maromak iha moris loron-loron no tau Maromak numeru um iha moris.
Presiza husik buat neebe la importante iha moris no tau hanoin diak sira iha moris hodi lao tuir Maromak nia hanorin sira iha moris loron-loron.
(eme)
