DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Loro Dias Ximenes afirma, iha loron 3 fulan Maiu tinan nee sei anunsia index liberdade imprensa iha Nova Yorke.
Nia dehan, index liberdade espresaun sei anunsia iha Nova Yorke mak hafoin hatene index tun ka sae, nunee Governu fo nafatin atensaun ba media sira atu kontinua halo atividade jornalistiku.
“kondisoes barak iha parte lejislasaun iha ekonomia iha seguransa, iha pilar barak ke halo avaliasaun ita hein took prosesu nee lao hela, neebe ita labele koalia ona katak ita index sae ka tun, ita labele advina lai, neebe hein depois iha dia 3 fulan Maiu tinan nee anunsia iha Nova Yorke mak foin ita hatene,” dehan Expedito Dias ba jornalista sira iha Palasiu Governu, Tersa (15/04/2025).
Nia afirma, Governu husu ba media sira kontinua halo servisu ba, maibe se bele notisia ka informasaun produtu jornalistiku nian bazeia ba faktus presiza halo mos investigasaun molok atu hatun notisia .
“Notisia labele bazeia ba rumoris maibe tenke bazeia ba faktus, atu hetan faktus diak halo cek no mos halo investigasaun molok fo sai, tanba nee Governu hamutuk ho Konselhu Imprensa iha formasaun kapasitasaun ba jornalista sira nia formatu mak karakter formasaun investigativu ka jornalizmu da paz,” dehan SECOMS
Nia Akresenta, jornalista sira servisu lao diak, laiha intervensaun, laiha servisu neebe mak ameasa ba jornalista sira no laiha intervensaun husi parte Governu ba politika editorial media nian.
“Hau dehan daudaun ita hein tanba ita nia kolega jornalista sira halo hela nia servisu media nain, sira halo hela servisu lejislasaun kona-ba komunikasaun sosial, ita prepara hela daudaun, ita nia ekonomia iha pilar barak no iha kondisoes barak halo avaliasaun atu bele hetan index neebe hein deit, sei avalia iha dia 3 Maiu tinan nee,” dehan Expedito.
(EST2)
