DILI, STLTIMORLESTE.com – Prezidente Republika (PR), Jose Ramos Horta hatete, iha ona ajendamentu fiksu fulan Novembru Prezidente Republika sei viajen ba Roma hasoru Papa Leao XIV.
Prezidente Republika Jose Ramos Horta hatoo lia hirak nee liu husi nia diskursu bainhira fo kondekorasaun ba lider husi entidade oin-oin neebe mak organiza eventu vizita Sua Santidade Papa Francisco mai Timor Leste, iha Palasiu Prezidensial Nicolao Lobato, Bairo Pite, Kinta (04/09/2025).
Horta hatete, Sua Santidade Papa Leao XIV simu informasaun kompletu konaba vizita Sua Santidade Papa Francisco durante iha Timor Leste, no Prezidente mos iha ajenda sei hasoru Amo Papa Leao iha Novembru nee.
“Amo Papa atual Leao simu informasaun kompletu sobre Amo Papa Francisco nia vizita, I Amo Papa Leao akompanha los hau nia programa nuudar Prezidente, hau ba hasoru Amo Papa vizita ofisial iha fulan Novembru, marka tiha ona konfirmado tiha ona, sei rona husi Amo Papa nia mensajen ruma bainhira karik mai Timor, ita sei haree tok,” dehan PR Horta.
Iha biban nee Prezidente Republika hatoo agradese ba Primeiru Ministru Kay Rala Xanana Gusmao nomos parte hotu neebe serbisu ho fuan laran badinas hodi selebra eventu hotu durante vizita sua santidade Papa Francisco iha Timor Leste neebe lao kapas tebes.
Xefe Estadu hatete, iha Setembru realiza aniversariu ba tinan ida Sua Santidade Papa Francisco nia vizita mai Timor Leste. No bainhira Amo Papa mate PR iha rai liur, no seidauk hatene Amo Papa foun ida neebe troka Papa Francisco maibe hili fali Papa Leao nee halo PR kontente tanba iha ona Papa ida.
Jornalista: Emerenciana Pinto
Editora: Domingas Gomes
