DILI, STLTIMORLESTE.com – Iha loron 11 no 12 fulan Abril, nasaun 14 inklui Timor Leste sei realiza konferensia G7+ hodi haree progresu no dezafiu neebe hasoru durante tinan 15.
Lia hirak nee hatoo husi Primeiru Ministru, Kay Rala Xanana Gusmão ba jornalista sira, bainhira remata halo enkontru Semanal ho Prezidente Republika Jose Ramos Horta iha palasiu Prezidensial Nicolao Lobato, Bairo Pite, Kinta (20/03/2025).
Primeiru Ministru dehan, hasoru malu ho Prezidente Republika Jose Ramos Horta koalia mos kona-ba preparasaun ba konferensia Ministerial G7+ neebe sei realiza iha Timor Leste, iha loron 11 no 12 fulan Abril tinan ida nee.
“Ami koalia mos iha dia 11 no 12 Abril sei iha konferensia Ministerial G7+ husi rai 14 mak atu mai iha konferensia ida nee hodi haree katak iha tinan 15 nee tanba buat nee funda iha 2010 iha Sentru Konvensaun Dili, tinan 15 liu tiha alkansa susesu iha neebe, iha neebe mak problema barak no problema oinusa,” dehan PM Xanana.
Nunee mos iha fali fulan Maiu sei iha organizasaun ida ONU nia hotu Comite Deskonolizasaun ONU nia atu halao iha Dili hodi diskute hamutuk estudante sira neebe estudu relasaun internasional iha universidade sira nee bele tuir, nunee bele loke hanoin kona-ba buat neebe sei akontese.
“Senhora ida naran Maria Resa premiu nobel da pas 2021 mos sei mai, maluk sira neebe uluk defende ita nia ukun aan agora defende nafatin Sahara Osidental mos sei mai halo kontaktu ho universidade sira ho dosente sira bele dehan katak hanorin nee laos hanorin deit ida nee no ida neeba deit, maibe hanorin oinsa haree ba mean, metan hodi loke hanoin, lae ita mak nunee deit,” katak PM Xanana.
Xefe Governu dehan, uluk bainhira haree deit ida dehan kuda kareta, agora tum tum, maibe uluk kuda mak dada kareta mais kuandu kuda tauk lao ba oin ninia oklu taka tiha matan haree deit ida, lao kurva mak foin dada sai ba sorin maibe agora nee tum tum.
“Se ita la loke ita nia hanoin luan ita mos sei sai kuda kareta, hau hatene ona agrikultura kona-ba saude, hau lakohi hatene kona-ba turizmu, hau lakohi hatene kona-ba Komersiu, hau lakohi hatene tanba ami nee agrikultura, hau hatene kona-ba turizmu buat seluk hau lakohi hatene, hau nia mak turizmu deit, nee labele, maibe tenke loke hanoin hodi haree kona-ba ita nia prosesu iha saida los mak atu dezenvolve,” Katak nia.
Iha biban nee, Primeiru Ministru husu joven sira nafatin aprende buat hotu nunee bele dezenvolve rai nee ba oin, tanba futuru nasaun iha joven sira nia liman.
(eme)
