VEMASI, STLTIMORLESTE.com – Fundasaun Sentru Feto Haburas Dezenvolvimentu (CFHD – sigla português) fasilita treinamentu ba Grupu Mariviloza iha Suku Kaikua, Postu Administrativu Vemasi, Munisipiu Baukau, tranforma produtu lokal ba produtu modernu neebe iha valor ekonomiku.
Diretora Ezekutiva Fundasaun CFHD, Tereza Pereira hateten, durante komunidade maioria seidauk iha koinhesementu kona-ba oinsa transforma produtu lokal hanesan sukaer ba produtu modernu hanesan rebusadu, tanba nee Fundasaun Sentru Feto Haburas Dezenvolvimentu utiliza fundu neebe apoiu husi Gabinete Apoiu Sosiedade Sivil hodi fasilita grupu feto sira iha Suku Kaikua Postu Administrativu Vemasi atu transforma sukaer sai produtu rebusadu neebe iha folin bele ajuda redimentu ekonomia familia.
“Formasaun kona-ba oinsa prosesa sukaer sai rebusadu sukaer iha nee loron ida, komesa husi dader hahu ho materia depois loraik ami pratika,” hateten Tereza ba jornalista sira iha Kaikua Vemasi hafoin remata sesaun teoria iha Kuarta nee (23/07/2025).
Nia sublina, liu husi formasaun refere bele fasilita ona Grupu Maraviloza hodi transforma sukaer sai prpdutu sukaer rebusadu, tanba molok pratika hahu ho teoria.
Nia fundamenta, Fundasaun CFHD kontinua planu ba futuru kontinua kobre Suku sira hodi implementa programa diferente neebe iha benefisiu ba komunidade, tanba Grupu rua neebe estabele iha Postu Vemasi hanesan Maraviloza no liu liu Feto Hadia Moris hatudu ona progresu, tanba hanesan grupu Feto Hadia Moris neebe foin istaladu seidauk too fulan, maibe iha ona rendimentu.
“Sira nia prosesamentu no rendimentu lao diak, sira prosesa ida nee ba dala haat ona sira hetan rendimentu bele suporta familia uma laran,” Tereza akresenta.
Xefe Grupu Maraviloza, Felismena da Silva sente kontente ho formasaun refere, tanba bele hetan kapasitasaun hodi transforma sukaer sai produtu rebusadu neebe iha folin bainhira faan iha nivel merkadu lokal.
“Selama nee ami faan iha merkadu sira nee bokar ida US$ 0,25, dala ruma husi treinamentu ida nee ami sei kontinua halo, tanba ami iha sukaer barak entaun ami sei kontinua ba oin hodi nunee hadia ami nia futuru sustenta nesesidade loro loron,” hateten Felismena.
Xefe grupu nee katak, produsaun refere sei ajuda sira nia rendimentu familia, tanba durante nee faan la halo transformasaun ba sukaer nunee faan bokar ida ho folin US$ 0,25 neebe laiha rendimentu diak durante epoka ida.
Maibe liu husi formasaun redere sei halo traformasaun sukaer ba produtu modernu hanesan rebusadu neebe garante sei iha folin hodi ajuda ekonomia familia.
Xefe Suku Kaikua, Anibal Henrique da Costa agradese ba Fundasaun CFHD, tanba bele fasilita formasaun ba grupu feto sira neebe eziste iha Suku Kaikua atu transforma produru sukaer sai produtu rebusadu sukaer neebe bele iha valor ekonomiku.
“Hanesan autoridade hakarak rekomenda formasaun nee lalika too iha nee deit, se bele kontinuasaun atu nunee ita nia grupu sira atu ba oinsa lori sira nia produtu lokal sai produtu modernu bele too iha merkadoria atu nunee sira bele hetan netik buat ruma iha neeba,” Anibal rekomenda.
Entertantu grupu Mariviloza akumula feto nian 10 neebe eziste iha Suku Kaikua, Postu Administrativu Vemasi, Munisipiu Baukau.
(tom)
