BAUKAU, STLTIMORLESTE.com – Fundasaun Klinika Lafaek Diak fo konsulta saude gratuitu ba komunidade sira iha area remotas hanesan iha Aldeia Itidaho, Samaguia, Suku Tekinomata, Postu Administrativu Laga, Munisipiu Baukau.
“Atividade ida nee ami hanaran mobile klinika voluntariu, ami mai fo konsulta gratuito no ami nia atividade nee hetan apoiu husi GASS. Atividade nee ami baibain halo iha area remotas no ohin loron ami halao iha Samaguia ho total pasiente 50 hanesan nee,” hateten Diretor Poliklinika Fundasaun Lafaek Diak, Delfin da Silva Belo Morais ba jornalista sira, iha Samaguia, Tersa (12/08/2025).
Nia esplika, programa mobile klinika neebe Fundasaun Klinika Lafaek Diak implementa iha area remotas sira hanesan iha Aldeia Itidaho, Samaguia no seluk tan nee, tanba hetan apoiu fundu husi Gabinete Apoiu Sosiedade Sivil (GASS) ho valor orsamentu rihun 30 ba objetivu fo konsulta saude gratuito ba komunidade sira iha area remotas neebe dook husi fasilidade saude publiku no privadu.
Maibe implementasaun mobile klinika iha Aldeia Itidaho Samaguia hetan partisipasaun pasiente nain 50 resin kompostu tipu moras Infesaun Respiratoriu Agudu, Moras Kulit, Hypertensaun no moras sira seluk neebe rejistu husi ema idade kiik too boot.
Mo komunidade sira neebe hetan ona konsulta husi mediku Klinika Lafaek Diak, sei kontinua hetan konsulta kada fulan nunee mediku sira bele kontinua observa kondisaun no bainhira detekta pasiente neebe konsumu ona ai-moruk ba moras neebe infrenta, maibe laiha mudansa ba kondisaun sei ajuda transfere ba Hospital Rejional sira hodi hetan assistensia saude diak liu tan.
Tanba objetivu husi mobile klinika nee, nuudar programa ajuda Governu lori besik tratamentu saude ba komunidade sira iha area remotas no motiva komunidade sira atu bele hakbesik aan ba fasilidade saude publiku no privadu sira, tanba durante nee nota komunidade barak infrenta moras, maibe la hakbesik ba fasilidade saude hodi hetan tratamentu husi mediku sira.
Pasiente Jacinto dos Santos Ximenes agradese ba planu Fundasaun Klinika Lafaek Diak, tanba bele lori besik atendimentu saude ba komunidade sira iha area remotas sira inklui, komunidade sira iha Aldeia Itidaho no Samaguia neebe durante nee la asesu fasilidade saude publiku nian.
Entretantu Xefe Suku Tekinomata, Abílio Diamantino Ximenes rekoinhese, komunidade sira iha Suku Tekinomata liu liu iha Aldeia Itidaho no Samaguia hela dook husi fasilidade saude publiku, neebe durante nee difikulta tebes komunidade sira atu halo tratamentu saude, tanba husi Samaguia ba Sentru Saude Laga distansia dook, maibe agredese, tanba liu husi Fundasaun Klinika Lafaek Diak bele lori besik atendimentu saude ba komunidade sira iha Aldeia Itidaho no Samaguia.
(tom)
