BAUKAU, STLTIMORLESTE.com – Fundasaun Lafaek Diak kumpri misaun no dever, lori besik atendimentu saude ba komunidade iha area remotas.
Diretor Poliklinika Ambulatriu Fundasaun Lafaek Diak, Delfim da Silva Belo Morais esplika, iha tinan 2025 Fundasaun Lafaek Diak hetan apoiu fundus husi Governu neebe aloka liu husi Gabinete Apoiu Sosiedade Sivil hamutuk rihun US$ 30, neebe implanta ona programa klinika movel iha area remotas sira liu liu Suku 10 resin, iha Munisipiu Baukau neebe konsidera dook husi fasilidade saude publiku sira.
“Husi Janeiru 2025 ami kobre Suku 12 no Suku neebe baibain pasiente barak liu iha Uaimanuboe Suku Uailili, Suku Samalari Ossoluga no Tekinomata Samaguai,” Delfim informa ba jornalista sira, hafoin implementa konsulta ba komunidade sira iha Aldeia Uaimanuboe, Suku Uailili, Postu Baukau Vila, Tersa (02/12/2025).
Nia sublina, husi Janeiru too Novembru 2025 ekipa husi Fundasaun Lafaek Diak kobre Suku sira no rejistu komunidade neebe konsulta saude barak liu mak husi Samaguia, Suku Tekinomata, Postu Administrativu Laga, Ossoluga Suku Samalari no Uaimanuboe Suku Uailili Postu Baukau Vila.
Nia fundamenta, razaun komunidade sira nia partisipasaun masimu iha programa konsulta refere, tanba komunidade sira husi area refere hela dook husi fasilidade saude publiku neebe difisil tebes hetan tratamentu saude, maibe liu husi programa klinika movel bele detekta sira nia moras no fo apoiu aimoruk gratutu ba komunidade sira.
“Iha tempu udan hanesan nee moras domina liu mak moras ISPA, Diarea moras Kulit,” Delfim informa.
Nia deklara, tipu moras neebe daudaun ekipa Lafaek Diak rejistu aas liu husi komunidade sira iha area remotas mak diarea, Infesaun Respiratoriu Agudu, Diarea no moras kulit.
Nia argumentu, kauza husi tipu moras hirak neebe afeta ba komunidade sira, tanba kauza husi impaktu mudansa klimatika no estilu moris neebe la saudavel.
“Liu husi politika klinika movel nee ami mos bele detekta sedu no bele redus mos moras ida neebe mak iha as vezes komunidade la hakbesik ba fasilidade saude, entaun ami apoiu liu husi atividade ida nee bele redus ona situasaun sira neebe mak pasiente sira hasoru” Delfim katak.
Komunidade Uaimanuboe, Suku Uailili, Mario Freita sente kontente ho politika Fundasaun Lafaek Diak, tanba bele lori besik atendimentu saude ba komunidade sira neebe hela dook husi fasilidade saude publiku sira.
“Mai besik ami ami sente kontente, tanba ami pasiente iha Uaimanuboe ba Sentru Saude Uailili dook, maibe Lafaek lori mai too ami nia Aldeia ami sente kontente tanba ami lao besik,” Mario komenta.
Komunidade nee argumentu, bainhira komunidade sira iha Aldeia Uaimanuboe hetan moras atu konsulta difisil tebes, tanba ba Sentru Saude Uailili lao kuaze kilometru 4 resin, maibe liu husi programa klinika movel neebe implementa husi Lafaek Diak fo vantajen ba komunidade sira, tanba aleinde konsulta no fo aimoruk mediku sira mos fo aimoruk liu husi sona.
Entretantu komunidade neebe partisipa iha programa Lafaek Diak nian klinika movel, iha Aldeia Uaimanuboe besik 100 kompostu husi labarik kiik too ema idozu sira.
Jornalista: Tomas Reis
Editora: Carme Ximenes
