BAUKAU, STLTIMORLESTE.com – Fundasaun Patria lansa formasaun ho tema “Haburas Abilidade Lideransa Transformativa Feto konselhu Suku” iha Munisipiu Baukau.
Reprezentante Diretora Fundasaun Patria, Idália Boavida hateten, formasaun ho tema Haburas Abilidade Lideransa Transformativa Feto konselhu Suku, ho objetivu atu kontinua haburas feto maluk sira nia abilidade transformativa ba lideransa feto nian iha nivel Suku neebe asumi ona pozisaun hanesan Xefe Aldeia, Xefe Suku no Delegada inklui Juventude feto atu kontinua transforma aan hodi halo mudansa hahu husi nivel Aldeia too Munisipiu.
“Oras nee daudaun ita iha maluk partisipante maioria feto sira reprezentante husi Xefe Suku, Xefe Aldeia, Delegada no foin sae feto sira kompostu husi Postu hirak eziste iha Munisipiu Baukau,” hateten Idália Boavida ba jornalista sira hafoin remata sesaun abertura formasaun iha salaun IADE Tirilolo Baukau, Kuarta (16/07/2025).
Nia informa, formasaun refere hetan partisipante feto hamutuk nain 50 kompostu Xefe Aldeia, Suku, Delegada no juventude feto neebe durante loron tolu hahu husi loron 16 too 18 Julhu iha salaun IADE Tirilolo Baukau.
Nia sublina, modul ba formasaun refere aprezenta husi Ministeriu Administrasaun Estatal kona-ba materia igualdade jeneru no inkluzaun, lideransa transformativa inklui materia Sido.
“Ita espera karak durante loron tolu nee laos tempu naruk maibe ita fiar katak ho sira nia ativu husi materia neebe sira hetan esperansa katak sira sei implementa fali ligadu lideransa transformativa,” Idália Boavida argumenta.
Sekretaria Munisipal Asuntu Sosial, Maria Celestina Viegas konsidera, formasaun refere importante ba feto maluk sira neebe daudaun asumi pozisaun iha estrutura suku, tanba bele eleva nafatin sira nia konhesimentu kona-ba atendimentu lideransa feto atende komunidade sira iha baze.
“Formasaun nee relevante tebes ba sira, atu fila husi formasaun nee sira bele kobre sira nia knaar ho diak liu tan,” hateten Maria Celestina Viegas.
Partisipante Delegada Aldeia Uaturau, Suku Gariuai, Graciana Lino Marçal sente kontente ho formasaun refere, tanba bele hetan kapasitasaun hodi servi komunidade iha Suku Gariuai.
“Hau sente kontente, tanba ho formasaun ida nee ami hatene liu tan aumenta ami nia kapasidade atu servi povu Suku Gariuai nian,” Granciana argumenta.
Entretantu formasaun neebe Fundasaun Patria realiza iha Munisipiu Baukau durante loron tolu no hetan apoiu fundus husi Gabinete Apoio Sosiedade Sivil (GASC-sigla português).
(tom)
