DILI, STLTIMORLESTE.com – Banku Sentral Timor Leste (BCTL – sigla português) lansa relatoriu Fundu Mina Rai Timor Leste nian trimestral dahuluk 2025 neebe termina iha loron 31 Marsu 2025, relatoriu hatudu katak iha kapital balansu Fundu Mina Rai trimestre nee bilhaun US$ 18,25 tun oituan kompara ho bilhaun US$ 18,27 iha trimestre dahaat 2024 nian.
Nia dehan, tuir Lei Fundu Mina Rai estipula katak Ministériu Finansas mak estabelese estratéjia investimentu ba ita nia fundu no BCTL iha responsabilidade sai jestor operasional ba investimentu Fundu Mina Rai nian.
“Nunee hakarak relata ba publiku katak iha trimestral primeiru 2025 nian, husi fulan Janeiru too 31 Marsu 2025, ita ninia fundu Mina Rai ninia balansu hamutuk bilhaun US$ 18,25, ida nee tun oituan kompara ho bilhaun US$ 18,27 neebe ita rejistu iha trimestral ikus 2024 nian, katak iha iha loron 31 Dezembru 2024 ninian,” hatete Governador BCTL, Helder Lopes liu husi Konferensia Imprensa iha Edifisiu BCTL, Tersa nee (6/05/2025).
Governante nee haktuir, tanba sa iha loron 1 Janeiru too 31 Marsu Dezembru 2024 dezempenhu Fundu Mina Rai nee halo nusa, primeiru reseitas neebe tama mai husi fontes rua reseitas husi faan nina no gas, ida mak retornu investimentu, tan nee durante periode trimestral primeiru osan neebé hetan faan mina no gas hamutuk tokon US$ 6,2, osan neebe mai husi faan mina no gas iha fulan 3 nia laran.
Nunee osan neebé hetan husi investimentu ou retornu husi investimentu Fundu Mina Rai iha merkadu finanseiru nee hamutuk tokon US$ 226,65 mai husi fontes fundamental tolu, primeiru dividendu hetan investimentu husi asoes kuandu sosa asoes Kompanhia halo profit ka fahe lukru fo mai ita, tanba ita kaer sira nia asoes, segundu kupaun hetan husi wainhira ita sosa titlu liu-liu tesouru Amerika nian, kuandu too ninia tempu nia tenke selu ninia juru mai ita nee kontribui ba divendu ho titlu nia kontribui ba total retornu nee hamutuk tokon US$ 133,71 no mai husi valor merkadu neebé tun ka sae husi asoes no titulu neebe ita kaer nee hamutuk tokon US$ 92,94, tanba investe iha merkadu finanseira investe asoes no titulu.
Nia dehan, husi osan tokon US$ 92,94 reflete ba nia valor sai no valor tun por kuandu fulan tolu 2025 nian, nee nia valor sae mak hamutuk tokon US$ 92,94 nunee wainhira tau iha presentajen iha trimestral primeiru husi dezempenhu Fundu Mina Rai nee konsege hetan ninian retornu 1,19% neebe boot liu benchmark 0,96%.
konkluzaun entermus retornu investimentu Fundu Mina Rai iha trimestral primeiru 2025 ita hetan retornu pozitivu tokon US$ 226,65 iha periode neebe hanesan iha osan nebe sai husi fundu ba buat rua, governu dada hodi finansia despezas Estadu, segundu dada osan montante kiak oan hodi selu ema sira neebe ajuda ita halo jestaun investimentu Fundu Mina Rai.
Nia dehan, iha periode trimestral primeiru 2025 nia total osan neebe sai Fundu Mina Rai hamutuk tokon US$ 254,03, husi total nee tokon US$ 250 dada iha fulan Fevereiru transfere ba tezouru Ministeriu Finansas nian hodi finansia despezas Estadu, trimestral primeiru ita dada US$ 50 milhões finansia despezas Estadu no restu tokon US$ 4,03 hodi selu jestor sira ajuda investe Fundu Mina Rai.
Total reseitas neebe fundu hetan husi faan mina no gas dezde fundu estabelese husi Janeiru too 31 Marsu 2025 hamutuk apoximadamente bilhaun US$ 25,25, total retornu husi investimentu iha merkadu finanseiru hamutuk bilhaun US$ 10,48 ho media retornu anual 4,41% total levatamentu hodi finansia orsamentu estadu hamutuk bilhaun US$ 17,66.
(joa)
