DILI, STLTIMORLESTE.com – Governador Banku Sentral Timor Leste (BCTL – sigla português), Helder Lopes hatete, fundu minarai agora iha bilhau US$ 18.68 no ninia returnu tinan ida nee hamutuk bilhaun US$ 1.1.
Nia dehan, ohin hasoru Prezidente Republika hodi aktualiza servisu neebe Banku Sentral Timor Leste halo liu-liu liga ho mandatu Banku Sentral Timor Leste nian iha area finanseria ka setor finanseiru nian, neebe inklui supervizaun ba servisu bankaria no instituisaun finanseira jestaun fundu minarai, sistema pagamentu nasional nunee mos monitorizasaun ba ekonomia Timor Leste nian.
“Ohin ami halo konversa iha area sira nee liu-liu liga ho jestaun fundu minarai nia, nunee ohin BCTL aktualiza ba Prezidente Republika katak, ita nia fundu minarai balansu agora bilhaun US$ 18.68, ita nia fundu minarai agora ninia returnu tinan ida nee hamutuk bilhaun US$ 1.1, no total osan neebe Governu levanta ona hodi finansia despeza publika too iha Novembru hamutuk bilhaun US$ 1.05, ida nee mak ohin atualiza ba Prezidente Republika, koalia kona-ba estratejia de investimentu fundu minarai nia neebe agora daudaun 65% ita investe iha titulus depois 35% ita investe iha asoens,” hatete Helder ba jornalista sira, bainhira remata hasoru malu ho Prezidente Republika iha palasiu Prezidensial, Nicolau Lobato, Bairo Pite, Dili, Kuarta (27/11/2024).
Iha hasoru malu nee nia dehan, diskuti mos kona-ba dezenpenhu nomos ba kresimentu ekonomia ba 2023 nia 2.4% prosesaun ba tinan 2024 sae ba 3.7% depois 2025 proseta ba ekonomia sae ba 4.4%.
Enkuantu kona-ba inflasaun ka sasan folin sae ba tinan ida nee liu husi politika ekonomika oin-oin, neebe governu no setor seluk halo inflasaun jeral agora daudaun menus husi 3%.
Husi setor finanseiru nia servisu progresu boot neebe agora daudaun indutria finanseira atiji ka iha prosesu mak promove dizitalizasaun servisu finanseiru, liu-liu BCTL husu ba banku sira ho instituisaun finanseiru sira tenke promove sira nia servisu dizital liu-liu internet banking mobile, depois sistema pagamentu internet kontinua servisu para estabelese infraestrutura sistema hodi nunee promove dizitalizasaun iha pagamentu katak, bainhira sosa sasan ruma aleinde uza osan fiziku bele mos uza ona instrumentu ka forma seluk hanesan kartaun ou husi telefone.
Iha biban nee nia konvida Prezidente Republika partisipa loron poupansa nasional no loron dizitalizasaun neebe sei selebra iha loron 29 agora no organiza husi BCTL.
Iha biban nee, Prezidente Republika, Jose Ramos Horta husu investe fundu Minarai iha Timor Leste maibe, ida nee kompetensia husi Governu nian.
Ida nee komptensia Governu nian, maibe governu presiza hanoin serake osan fundu minarai nee bele dada balu mai hodi investe iha Timor Leste para labele hetan deit returnu finanseiru maibe return finanseiru, returnu ekonomiku no returnu sosial.
Prezidente Republika iha tendensia liu kona-ba halo investe fundu minarai nee mai Timor Leste, maibe nee kompetensia Governu nian.
(eme)
